Правила подготовки к причастию и исповеди, что нужно и нельзя делать

Процесс подготовки к святому причастию постепенно формировался со времен древних христиан. Сегодня все базовые положения закреплены в документе «Об участии верных в Евхаристии». В православной церкви не требуют от человека жесткого выполнения закона, поэтому к каждому христианину существует индивидуальный подход. Но нужно знать основные требования подготовки к таинству и стремиться их реализовывать.

Основные этапы подготовки к святому причащению в православии

В духовной жизни причастие считается главным таинством. В нем происходит соединение с Христом. Чтобы получить пользу для души, необходима тщательная подготовка, которая осуществляется на нескольких уровнях.

Молитвенное правило

Жизнь христианина немыслима без молитвы. Утреннее и вечернее общение с Богом сопровождает верующего человека ежедневно. Сделать душу готовой к причастию помогут дополнительные молитвы:

• покаянный канон к Господу;
• молебный канон к Богородице;
• канон Ангелу Хранителю;
• последование ко Святому Причащению.

Эти тексты довольно объемные и прочитать их за один раз сложно. Священники допускают разделить чтение на несколько дней. По возможности христианину полагается посещать храмовые богослужения, особенно вечером перед причастием.

Пост

Приготовление к причастию в православии называются говением. Оно может продолжаться от 1 до 7 дней, в зависимости от интенсивности духовной жизни. Пост понимается широко и включает в себя:

• ограничение животной пищи (мясо, молоко, яйца);
• исключение развлечений;
• отказ от греховных дел, слов и мыслей;
• воздержание от супружеской близости.

Это общие требования, которые могут корректироваться в зависимости от духовного опыта, состояния здоровья, ситуации в семье. Например, беременной и кормящей женщине, а также детям до 3 лет ограничения в еде снимаются до нулевой отметки.

Христианам, которые соблюдают все многодневные и однодневные посты, регулярно приступают к таинствам, положено не есть, не пить лишь в ночь перед причастием.

Исповедь и покаяние

Покаяние в православии понимается широко и имеет два значения:

• фундаментальный переход от грехов на жизнь по евангельским заповедям;
• одно из таинств.

В Русской православной церкви принята обязательная исповедь перед причастием. Таинство покаяния — это краткая форма свидетельства осознания перед Богом своей греховности, очищение души. Исповедь совершается на вечернем богослужении. Некоторые храмы еще поддерживают практику проведения таинства на литургии. Священник, как свидетель покаяния, прощает человеку согрешения от имени Господа Иисуса Христа.

Чтобы правильно построить исповедь, нужно время на подготовку. Особенно если человек идет в первый раз.

Важно переосмыслить всю жизнь и выделить поступки, за которые мучит совесть. Полезно почитать духовную литературу перед причастием.

По субботам, воскресеньям и праздникам храмы переполнены, поэтому священники рекомендуют тем, кто впервые приступает к таинству, приходить в будние дни. В этом случае батюшка сможет уделить достаточно времени, ответить на насущные вопросы, посоветовать дальнейшие действия. Ведь исповедь, особенно первая, — это тайна воссоединения человека и Бога. Это великое событие, которое невозможно забыть.

Примирение

Опасно приступать к причастию, когда в сердце бушуют страсти гнева, обиды, вражда. Необходимо смиренно попросить прощения у всех, с кем возникали какие-либо недопонимания.

Бывает, что не всегда есть возможность сделать это лично, в таком случае нужно примириться хотя бы в душе.

Разумеется, простить и просить прощения нелегко. Человеческая душа глубоко поражена гордостью и самолюбием. Церковь учитывает этот аспект и не требует моментального преображения. Главное здесь заключается в том, что человек искренно желает исправления, стремится к нему. А Господь поощряет и благие намерения.

Что делать во время исповедания в православной церкви

В каждом храме существуют некоторые нюансы проведения исповеди. Лучше подойти заранее в выбранную церковь, узнать у священника, как правильно подготовиться к таинству и когда прийти.

Как правило, батюшки принимают исповедь в специально отведённом месте или комнате храма во время богослужения, до него или после. Нужно узнать у работников церкви, где именно совершается таинство и во сколько. На специальном столике, который называется аналой, священник кладёт Евангелие и крест. Исповедники подходят по одному, приносят Богу покаяние, называя свои грехи. Батюшка может задать вопросы, на которые необходимо честно ответить.

Затем священник произносит разрешительную молитву, накладывая епитрахиль (длинное полотно ткани, огибающее шею духовного лица) на голову кающегося человека. После этого христианин крестится, целует Евангелие и крест, получает благословение батюшки на причастие. Если человек не допускается к таинству, то духовник обязан объяснить причину. Она может быть связана с серьезными нарушениями канонов церкви или наложением епитимьи за тяжкий грех.

Список грехов

При подготовке к исповеди, особенно первой, обнаруживается большое количество грехов, которые сложно запомнить. К тому же возле аналоя человек может испытывать сильное волнение и даже плакать.

Сегодня в православной церкви распространена практика фиксирования совершенных грехов на лист бумаги. Такую записку читает священник или сам кающийся.

Святитель Игнатий Брянчанинов подразделяет грехи на три категории: против Бога, ближнего и себя.

Некоторые грехи против Бога:

• безбожие;
• вероотступничество;
• суеверие;
• ропот;
• волшебство, магия, гадание;
• самоубийство и мысли о нем;
• чревоугодие;
• гордость;
• тщеславие.

Против ближнего:

• гнев;
• ненависть;
• осуждение;
• оскорбления;
• побои;
• мстительность;
• воровство;
• неприязнь.

Против себя:

• зависть;
• раздражительность;
• жестокосердие;
• сребролюбие;
• блуд;
• пьянство;
• сквернословие.

Со временем письменную исповедь допускается заменить на устную. Жестких требований здесь нет. Человек имеет право каяться так, как ему удобно. Главное, чтобы покаяние было искренним и вело к исправлению жизни.

Правильно составить список грехов поможет специальная литература, созданная святыми отцами в помощь верующему народу. Некоторые духовники рекомендуют каждый вечер при чтении молитв анализировать прошедший день и записывать все плохие поступки, слова и помышления. При очередной подготовке к исповеди будет проще.

Тексты молитв

Обязательным при подготовке к причастию является прочтение последования ко святому причащению. Текст читается вечером либо утром перед службой. В перечень входят:

• начало;
• псалмы 22, 23, 115, 50;
• канон из 9 песен;
• 10 молитв;
• тропари.

Последование ко Святому Причащению

Моли́твами святы́х отéц нáших, Гóсподи Иису́се Христé Бóже наш, поми́луй нас. Ами́нь.

Царю́ Небéсный, Утéшителю, Ду́ше и́стины, И́же вездé сый и вся исполня́яй, Сокрóвище благи́х и жи́зни Подáтелю, прииди́ и всели́ся в ны, и очи́сти ны от вся́кия сквéрны, и спаси́, Блáже, ду́ши нáша.

Святы́й Бóже, Святы́й Крéпкий, Святы́й Безсмéртный, поми́луй нас (трижды).

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́менé Твоегó рáди.

Гóсподи поми́луй (трижды).

Слáва, и ны́не:

Óтче наш, И́же еси́ на небесéх! Да святи́тся и́мя Твоé, да прии́дет Цáрствие Твоé, да бу́дет вóля Твоя́, я́ко на небеси́ и на земли́ Хлеб наш насу́щный даждь нам днесь; и остáви нам дóлги нáша, я́коже и мы оставля́ем должникóм на́шим; и не введи́ нас во искушéние, но избáви нас от лукáваго.

Гóсподи поми́луй (12раз).

Прииди́те, поклони́мся Царéви нáшему Бóгу. (Поклон)

Прииди́те, поклони́мся и припадéм Христу́, Царéви нáшему Бóгу. (Поклон)

Прииди́те, поклони́мся и припадéм Самому́ Христу́, Царéви и Бóгу нáшему. (Поклон)

Псалом 22

Госпóдь пасéт мя, и ничтóже мя лиши́т. На мéсте злáчне, тáмо всéли мя, на водé покóйне воспитá мя. Ду́шу мою́ обрати́, настáви мя на стези́ прáвды, и́мене рáди Своегó. Áще бо и пойду́ посредé сéни смéртныя, не убою́ся зла, я́ко Ты со мнóю еси́, жезл Твой и пáлица Твоя́, та мя утéшиста. Уготóвал еси́ прéдо мнóю трапéзу сопроти́в стужáющым мне, умасти́л еси́ елéом главу́ мою́, и чáша Твоя́ упоявáющи мя, я́ко держáвна. И ми́лость Твоя́ поженéт мя вся дни животá моегó, и éже всели́ти ми ся в дом Госпóдень, в долготу́ дний.

Псалом 23

Госпóдня земля́, и исполнéние ея́, вселéнная и вси живу́щии на ней. Той на моря́х основáл ю́ есть, и на рекáх уготóвал ю́ есть. Кто взы́дет на гóру Госпóдню? Или́ кто стáнет на мéсте святéм Егó? Непови́нен рукáма, и чист сéрдцем, и́же не прия́т всу́е ду́шу свою́, и не кля́тся лéстию и́скреннему своему́. Сей прии́мет благословéние от Гóспода, и ми́лостыню от Бóга Спáса своегó. Сей род и́щущих Гóспода, и́щущих лицé Бо́га Иáковля. Возми́те вратá кня́зи вáша, и возми́теся вратá вéчная, и вни́дет Царь слáвы. Кто есть сей Царь слáвы? Госпóдь крéпок и си́лен, Госпóдь си́лен в брáни. Возми́те вратá кня́зи вáша, и возми́теся врáта вéчная, и вни́дет Царь слáвы. Кто есть сей Царь слáвы? Госпóдь сил, Той есть Царь слáвы.

Псалом 115

Вéровах, тéмже возглагóлах, аз же смири́хся зелó. Аз же рех во изступлéнии моéм: всяк человéк ложь. Что воздáм Гóсподеви о всех, я́же воздадé ми? Чáшу спасéния прииму́ и и́мя Госпóдне призову́, моли́твы моя́ Гóсподеви воздáм пред всéми людьми́ Егó. Честнá пред Гóсподем смерть преподóбных Егó. О, Гóсподи, аз раб Твой, аз раб Твой, и сын рабы́ни Твоея́; растерзáл еси́ у́зы моя́. Тебé пожру́ жéртву хвалы́, и во и́мя Госпóдне призову́. Моли́твы моя́ Гóсподеви воздáм пред всéми людьми́ Егó, во дворéх дóму Госпóдня, посредé тебé, Иерусали́ме.

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Аллилу́иа, аллилу́иа, аллилу́иа, слава Тебе, Боже (трижды). И три поклона.

Тропари, глас 8-й

Беззакóния моя́ прéзри, Гóсподи, от Дéвы рождéйся, и сéрдце моé очи́сти, храм то творя́ пречи́стому Твоему́ Тéлу и Крóви, нижé отри́ни менé от Твоегó лицá, без числá имéяй вéлию ми́лость.

Слава: Во причáстие святы́нь Твои́х кáко дерзну́, недостóйный? Áще бо дерзну́ к Тебé приступи́ти с достóйными, хитóн мя обличáет, я́ко несть вечéрний, и осуждéние исходáтайствую многогрéшной души́ моéй. Очи́сти, Гóсподи, сквéрну души́ моея́, и спаси́ мя, я́ко Человеколю́бец.

И ныне: Мнóгая мнóжества мои́х, Богорóдице, прегрешéний, к Тебé прибегóх, Чи́стая, спасéния трéбуя: посети́ немощству́ющую мою́ ду́шу, и моли́ Сы́на Твоегó и Бóга нáшего, дáти ми оставлéние, я́же содéях лю́тых, еди́на Благословéнная.

[Во святую же Четыредесятницу:

Егдá слáвнии ученицы́ на умовéнии вéчери просвещáхуся, тогдá Иу́да злочести́вый сребролю́бием неду́говав омрачáшеся, и беззакóнным судия́м Тебé прáведнаго Судию́ предаéт. Ви́ждь, имéний рачи́телю, сих ради́ удавлéние употреби́вша: бежи́ несы́тыя души́, Учи́телю таковáя дерзну́вшия. И́же о всех благи́й Гóсподи, слáва Тебé.]

Псалом 50

Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя от беззакóния моегó, и от грехá моегó очи́сти мя; я́ко беззакóние моé аз знáю, и грех мой прéдо мнóю есть вы́ну. Тебé еди́ному согреши́х и лукáвое пред Тобóю сотвори́х; я́ко да оправди́шися во словесéх Твои́х, и победи́ши внегдá суди́ти Ти. Се бо в беззакóниих зачáт есмь, и во гресéх роди́ мя мáти моя́. Се бо и́стину возлюби́л еси́; безвéстная и тáйная прему́дрости Твоея́ яви́л ми еси́. Окропи́ши мя иссóпом, и очи́щуся; омы́еши мя, и пáче снéга убелю́ся. Слу́ху моему́ дáси рáдость и весéлие; возрáдуются кóсти смирéнныя. Отврати́ лицé Твоé от грех мои́х и вся беззакóния моя́ очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó и Ду́ха Твоегó Святáго не отыми́ от менé. Воздáждь ми рáдость спасéния Твоегó и Ду́хом Влады́чним утверди́ мя. Научу́ беззакóнныя путéм Твои́м, и нечести́вии к Тебé обратя́тся. Избáви мя от кровéй, Бóже, Бóже спасéния моегó; возрáдуется язы́к мой прáвде Твоéй. Гóсподи, устнé мои́ отвéрзеши, и устá моя́ возвестя́т хвалу́ Твою́. Я́ко áще бы восхотéл еси́ жéртвы, дал бых у́бо: всесожжéния не благоволи́ши. Жéртва Бóгу дух сокрушéн; сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твои́ тельцы́.

Канон, глас 2-й

Песнь 1

Ирмос: Гряди́те, лю́дие, пои́м песнь Христу́ Бóгу, раздéльшему мóре, и настáвльшему лю́ди, я́же изведé из рабóты еги́петския, я́ко прослáвися.

Припев: Сéрдце чи́сто сози́жди во мне, Бóже, и дух прав обнови́ во утрóбе моéй.

Хлеб животá вéчнующаго да бу́дет ми Тéло Твоé Святóе, благоутрóбне Гóсподи, и Честнáя Кровь, и неду́г многообрáзных исцелéние.

Припев: Не отвéржи менé от лицá Твоегó, и Ду́ха Твоегó Святáго не отыми́ от менé.

Осквернéн дéлы безмéстными окая́нный, Твоегó Пречи́стаго Тéла и Божéственныя Крóве недостóин есмь, Христé, причащéния, егóже мя сподóби.

Припев: Пресвятáя Богорóдице, спаси́ нас.

Земле благáя, благословéнная Богоневéсто, клас прозя́бшая неорáнный и спаси́тельный ми́ру, сподóби мя сей яду́ща спасти́ся.

Песнь 3

Ирмос: На кáмени мя вéры утверди́в, разшири́л ecи́ устá моя́ на враги́ моя́. Возвесели́ бо ся дух мой, внегдá пéти: несть свят, я́коже Бог наш, и несть прáведен пáче Тебé, Гóсподи.

Сéрдце чи́сто сози́жди во мне, Бóже, и дух прав обнови́ во утрóбе моéй.

Слéзныя ми подáждь, Христé, кáпли, сквéрну сéрдца моегó очищáющия: я́ко да благóю сóвестию очи́щен, вéрою прихожду́ и стрáхом, Влады́ко, ко причащéнию Божéственных даро́в Твои́х.

Не отвéржи менé от лицá Твоегó, и Ду́ха Твоегó Святáго не отыми́ от менé.

Во оставлéние да бу́дет ми прегрешéний Пречи́стое Тéло Твоé, и Божéственная Кровь, Ду́ха же Святáго общéние, и в жизнь вéчную, Человеколю́бче, и страстéй и скорбéй отчуждéние.

Пресвятáя Богорóдице, спаси́ нас.

Хлéба живóтнаго Трапéза Пресвятáя, свы́ше ми́лости рáди сшéдшаго, и ми́рови нóвый живóт даю́щаго, и менé ны́не сподóби недостóйнаго, со стрáхом вкуси́ти сегó, и жи́ву бы́ти.

Песнь 4

Ирмос: Пришéл еси́ от Дéвы, не ходáтай, ни Áнгел, но Сам, Гóсподи, воплóщься, и спасл еси́ всегó мя человéка. Тем зову́ Ти: слáва си́ле Твоéй, Гóсподи.

Сéрдце чи́сто сози́жди во мне, Бóже, и дух прав обнови́ во утрóбе моéй.

Восхотéл еси́, нас рáди воплóщься, Многоми́лостиве, заклáн бы́ти я́ко овчá, грех рáди человéческих: тéмже молю́ Тя, и моя́ очи́сти согрешéния.

Не отвéржи менé от лицá Твоегó, и Ду́ха Твоегó Святáго не отыми́ от менé.

Исцели́ души́ моея́ я́звы, Гóсподи, и всегó освяти́: и сподóби, Влады́ко, я́ко да причащу́ся тáйныя Твоея́ Божéственныя вéчери, окая́нный.

Пресвятáя Богорóдице, спаси́ нас.

Уми́лостиви и мне Су́щаго от утрóбы Твоея́, Влады́чице, и соблюди́ мя несквéрна рабá Твоегó и непорóчна, я́ко да приéм у́мнаго би́сера, освящу́ся.

Песнь 5

Ирмос: Свéта подáтелю и векóв Твóрче, Гóсподи, во свéте Твои́х повелéний настиáви нас; рáзве бо Тебé инóго бóга не знáем.

Сéрдце чи́сто сози́жди во мне, Бóже, и дух прав обнови́ во утрóбе моéй.

Я́коже предрéкл еси́, Христé, да бу́дет у́бо худóму рабу́ Твоéму, и во мне пребу́ди, я́коже обещáлся еси́: се бо Тéло Твоé ям Божéственное, и пию́ Кровь Твою́.

Не отвéржи менé от лицá Твоегó, и Ду́ха Твоегó Святáго не отыми́ от менé.

Слóве Бóжий и Бóже, угль Тéла Твоегó да бу́дет мне помрачéнному в просвещéние, и очищéние осквернéнной души́ моéй Кровь Твоя́.

Пресвятáя Богорóдице, спаси́ нас.

Мари́е, Мáти Бóжия, благоухáния честнóе селéние, Твои́ми моли́твами сосу́д мя избрáнный содéлай, я́ко да освящéний причащу́ся Сы́на Твоего́.

Песнь 6

Ирмос: В бéздне грехóвней валя́яся, неизслéдную милосéрдия Твоегó призывáю бéздну: от тли, Бóже, мя возведи́.

Сéрдце чи́сто сози́жди во мне, Бóже, и дух прав обнови́ во утрóбе моéй.

Ум, ду́шу и сéрдце освяти́, Спáсе, и тéло моé, и сподóби неосуждéнно, Влады́ко, к стрáшным Тáйнам приступи́ти.

Не отвéржи менé от лицá Твоегó, и Ду́ха Твоегó Святáго не отыми́ от менé.

Да бых устрани́лся от страстéй, и Твоея́ благодáти имéл бы приложéние, животá же утверждéние, причащéнием Святы́х, Христé, Тáин Твои́х.

Пресвятáя Богорóдице, спаси́ нас.

Бóжие, Бóже, Слóво Святóе, всегó мя освяти́, ны́не приходя́щаго к Божéственным Твои́м Тáйнам, Святы́я Мáтере Твоея́ мольбáми.

Кондак, глас 2-й

Хлеб, Христé, взя́ти не прéзри мя, Тéло Твоé, и Божéственную Твою́ ны́не Кровь, пречи́стых, Влады́ко, и стрáшных Твои́х Тáин причасти́тися окая́ннаго, да не бу́дет ми в суд, да бу́дет же ми в живóт вéчный и безсмéртный.

Песнь 7

Ирмос: Тéлу златóму прему́дрыя дéти не послужи́ша, и в плáмень сáми поидóша, и бóги их обругáша, среди́ плáмене возопи́ша, и ороси́я Áнгел: услы́шася уже уст вáших моли́тва.

Сéрдце чи́сто сози́жди во мне, Бóже, и дух прав обнови́ во утрóбе моéй.

Истóчник благи́х, причащéние, Христé, безсмéртных Твои́х ны́не Тáинств да бу́дет ми свет, и живóт, и безстрáстие, и к преспея́нию же и умножéнию добродéтели божéственнеи́ший ходатáйственно, еди́не Блáже, я́ко да слáвлю Тя.

Не отвéржи менé от лицá Твоегó, и Ду́ха Твоегó Святáго не отыми́ от менé.

Да избáвлюся от страстéй, и врагóв, и ну́жды, и вся́кия скóрби, трéпетом и любóвию со благоговéнием, Человеколю́бче, приступáяй ны́не к Твои́м безсмéртным и Божéственным Тáйнам, и пéти Тебé сподóби: благословéн еси́, Гóсподи, Бóже отéц нáших.

Пресвятáя Богорóдице, спаси́ нас.

Спáса Христá рóждшая пáче ума, Богоблагодáтная, молю́ Тя ны́не, раб Твой, Чи́стую нечи́стыи́: хотя́щаго мя ны́не к пречи́стым Тáйнам приступи́ти, очи́сти всегó от сквéрны плóти и ду́ха.

Песнь 8

Ирмос: В пещь óгненную ко óтроком еврéйским снизшéдшаго, и плáмень в росу́ прелóжшаго Бóга, пóйте делá, я́ко Гóспода, и превозноси́те во вся вéки.

Сéрдце чи́сто сози́жди во мне, Бóже, и дух прав обнови́ во утрóбе моéй.

Небéсных, и стрáшных, и святы́х Твои́х, Христé, ны́не Тáин, и Божéственныя Твоея́ и тáйный вéчери óбщника бы́ти и менé сподóби отчáяннаго, Бóже Спáсе мой.

Не отвéржи менé от лицá Твоегó, и Ду́ха Твоегó Святáго не отыми́ от менé.

Под Твоé прибéг благоутрóбие, Блáже, со стрáхом зову́ Ти: во мне пребу́ди, Спáсе, и аз, я́коже рекл еси́, в Тебé; се бо дерзáя на ми́лость Твою́, ям Тéло Твоé, и пию́ Кровь Твою́.

Припев: Пресвятáя Трóице, Бóже наш, слáва Тебé.

Троичен: Трепещу́, приéмля огнь, да не опалю́ся я́ко воск и я́ко травá; óле стрáшнаго тáинства! óле благоутрóбия Бóжия! Кáко Божéственнаго Тéла и Крóве брéние причащáюся, и нетлéнен сотворя́юся?

Песнь 9

Ирмос: Безначáльна Роди́теля Сын, Бог и Госпóдь, воплóщься от Дéвы нам яви́ся, омрачéнная просвети́ти, собрáти расточéнная: тем всепéтую Богорóдицу величáем.

Сéрдце чи́сто сози́жди во мне, Бóже, и дух прав обнови́ во утрóбе моéй.

Христóс есть, вкуси́те и ви́дите: Госпóдь нас рáди, по нам бо дрéвле бы́вый, еди́ною Себé принéс, я́ко приношéние Отцу́ Своему́, при́сно закаля́ется, освящáяй причащáющияся.

Не отвéржи менé от лицá Твоегó, и Ду́ха Твоегó Святáго не отыми́ от менé.

Душéю и тéлом да освящу́ся, Влады́ко, да просвещу́ся, да спасу́ся, да бу́ду дом Твой причащéнием свящéнных Тáин, живу́щаго Тя имéя в себé со Отцéм и Ду́хом, Благодéтелю Многоми́лостиве.

Припев: Воздáждь ми рáдость спасéния Твоегó и Ду́хом Влады́чним утверди́ мя.

Я́коже огнь да бу́дет ми, и я́ко свет, Тéло Твоé и Кровь, Спáсе мой, пречестнáя, опаля́я грехóвное веществó, сжигáя же страстéй тéрние, и всегó мя просвещáя, покланя́тися Божеству́ Твоéму.

Пресвятáя Богорóдице, спаси́ нас.

Бог воплóтися от чи́стых кровéй Твои́х; тéмже вся́кий род поéт Тя, Влады́чице, у́мная же мнóжества слáвят, я́ко Тобóю я́ве узрéша всéми Влады́чествующаго, осуществовáвшагося человéчеством.

Достóйно есть я́ко вои́стинну блажи́ти Тя Богорóдицу, Присноблажéнную и Пренепорóчную и Мáтерь Бо́га нáшего. Честнéйшую Херуви́м и славнéй́шую без сравнéния Серафи́м, без истлéния Бóга Слóва рóждшую, су́щую Богорóдицу Тя величáем.

Святы́й Бóже, Святы́й Крéпкий, Святы́й Безсмéртный, поми́луй нас (трижды).

Слáва Отцу́ и Сы́ну и Святóму Ду́ху, и ны́не и при́сно и во вéки векóв. Ами́нь.

Пресвятáя Трóице, поми́луй нас; Гóсподи, очи́сти грехи́ нáша; Влады́ко, прости́ беззакóния нáша; Святы́й, посети́ и исцели́ нéмощи нáша, и́мене Твоегó рáди.

Го́споди поми́луй (трижды).

Слáва, и ны́не:

Óтче наш, И́же еси́ на небесéх! Да святи́тся и́мя Твоé, да прии́дет Цáрствие Твоé, да бу́дет вóля Твоя́, я́ко на небеси́ и на земли́. Хлеб наш насу́щный даждь нам днесь; и остáви нам дóлги нáша, я́коже и мы оставля́ем должникóм нáшим; и не введи́ нас во искушéние, но избáви нас от лукáваго.

Тропарь дня, или праздника. Если неделя, тропарь воскресный по гласу. Если же нет, настоящие тропари, глас 6-й:

Поми́луй нас, Гóсподи, поми́луй нас; вся́каго бо отвéта недоумéюще, сию́ Ти моли́тву, я́ко Влады́це, грéшнии принóсим: поми́луй нас.

Слава: Гóсподи, поми́луй нас, на Тя бо уповáхом; не прогнéвайся на ны зелó, нижé помяни́ беззакóний нáших, но при́зри и ны́не я́ко благоутрóбен, и избáви ны от враг нáших. Ты бо еси́ Бог наш, и мы лю́дие Твои́, вси делá руку́ Твоéю, и и́мя Твоé призывáем.

И ныне: Милосéрдия двéри отвéрзи нам, благословéнная Богоро́дице, надéющиися на Тя да не поги́бнем, но да избáвимся Тобóю от бед: Ты бо еси́ спасéние рóда христиáнскаго.

Гóсподи поми́луй (40).

И поклоны, сколько хочешь.

И стихи:

Хотя́ я́сти, человéче, Тéло Влады́чне,

Стрáхом приступи́, да не опали́шися: огнь бо есть.

Божéственную же пия́ Кровь ко общéнию,

Пéрвее примири́ся тя опечáлившим.

Тáже дерзáя, тáинственное брáшно яждь.

Прéжде причáстия стрáшныя жéртвы,

Животворя́щаго Тéла Влады́чня,

Сим помоли́ся óбразом со трéпетом:

Молитва Василия Великого, 1-я

Влады́ко Гóсподи Иису́се Христé, Бóже наш, истóчниче жи́зни и безсмéртия, всея́ твáри ви́димыя и неви́димыя Содéтелю, безначáльнаго Отцá соприсносу́щный Сы́не и собезначáльный, премнóгия рáди блáгости в послéдния дни в плоть оболки́йся, и распны́йся, и погребы́йся за ны неблагодáрныя и злонрáвныя, и Твоéю крóвию обнови́вый растлéвшее грехóм естествó нáше, Сам, Безсмéртный Царю́, приими́ и моé грéшнаго покая́ние, и приклони́ у́хо Твоé мне, и услы́ши глагóлы моя́. Согреши́х бо, Гóсподи, согреши́х на нéбо и пред Тобóю, и несмь достóин воззрéти на высóту слáвы Твоея́: прогнéвах бо Твою́ блáгость, Твоя́ зáповеди преступи́в, и не послу́шав Твои́х повелéний. Но Ты, Гóсподи, незлóбив сый, долготерпели́в же и многоми́лостив, не предáл еси́ мя поги́бнути со беззакóньми мои́ми, моегó вся́чески ожидáя обращéния. Ты бо рекл еси́, Человеколю́бче, прорóком Твои́м: я́ко хотéнием не хощу́ смéрти грéшника, но éже обрати́тися и жи́ву бы́ти ему́. Не хóщеши бо, Влады́ко, создáния Твоéю руку́ погуби́ти, нижé благоволи́ши о поги́бели человéчестей, но хóщеши всем спасти́ся, и в рáзум и́стины приити́. Тéмже и аз, áще и недостóин есмь небесé и земли́, и сея́ приврéменныя жи́зни, всегó себé повину́в греху́, и сластéм порабóтив, и Твой оскверни́в óбраз; но творéние и создáние Твоé быв, не отчаявáю своегó спасéния окая́нный, на Твоé же безмéрное благоутрóбие дерзáя, прихожду́. Приими́ у́бо и менé, Человеколю́бче Гóсподи, я́коже блудни́цу, я́ко разбóйника, я́ко мытаря́ и я́ко блу́днаго, и возми́ моé тя́жкое брéмя грехóв, грех взéмляй ми́ра, и нéмощи человéческия исцеля́яй, труждáющияся и обременéнныя к Себé призывáяй и упокоевáяй, не пришéдый призвáти прáведныя, но грéшныя на покая́ние. И очи́сти мя от вся́кия сквéрны плóти и ду́ха, и научи́ мя совершáти святы́ню во стрáсе Твоéм: я́ко да чи́стым свéдением сóвести моея́, святы́нь Твои́х часть приéмля, соединю́ся святóму Тéлу Твоему́ и Крóви, и имéю Тебé во мне живу́ща и пребывáюща, со Отцéм и Святы́м Твои́м Ду́хом. Ей, Гóсподи Иису́се Христé, Бóже мой, и да не в суд ми бу́дет причáстие пречи́стых и животворя́щих Тáин Твои́х, нижé да нéмощен бу́ду душéю же и тéлом, от éже недостóйне тем причащáтися, но даждь ми, дáже до конéчнаго моегó издыхáния, неосуждéнно восприимáти часть святы́нь Твои́х, в Ду́ха Святáго общéние, в напу́тие животá вéчнаго, и во благоприя́тен отвéт на Стрáшнем Суди́щи Твоéм: я́ко да и аз со всéми избрáнными Твои́ми óбщник бу́ду нетлéнных Твои́х благ, я́же уготóвал еси́ лю́бящим Тя, Гóсподи, в ни́хже препрослáвлен еси́ во вéки. Ами́нь.

Молитва святого Иоанна Златоустого, 2-я

Гóсподи Бóже мой, вем, я́ко несмь достóин, нижé довóлен, да под кров вни́деши хрáма души́ моея́, занéже весь пуст и пáлся есть, и не и́маши во мне мéста достóйна éже главу́ подклони́ти; но я́коже с высоты́ нас рáди смири́л еси́ Себé, смири́ся и ны́не смирéнию моему́; и я́коже восприя́л еси́ в вертéпе и в я́слех безсловéсных возлещи́, си́це восприими́ и в я́слех безсловéсныя моея́ души́, и во осквернéнное моé тéло вни́ти. И я́коже не неудостóил еси́ вни́ти, и свечеря́ти со грéшники в дому́ Си́мона прокажéннаго, тáко извóли вни́ти и в дом смирéнныя моея́ души́, прокажéнныя и грéшныя; и я́коже не отри́нул еси́ подóбную мне блудни́цу и грéшную, пришéдшую и прикосну́вшуюся Тебé, си́це умилосéрдися и о мне грéшнем, приходя́щем и прикасáющем Ти ся; и я́коже не возгнушáлся еси́ сквéрных ея уст и нечи́стых, целу́ющих Тя, нижé мои́х возгнушáйся сквéрнших óныя уст и нечи́стших, нижé мéрзких мои́х и нечи́стых устéн, и сквéрнаго и нечи́стейшаго моегó язы́ка. Но да бу́дет ми угль пресвятáго Твоегó Тéла, и честны́я Твоея́ Крóве, во освящéние и просвещéние и здрáвие смирéнней моéй души́ и тéлу, во облегчéние тя́жестей мнóгих мои́х согрешéний, в соблюдéние от вся́каго диáвольскаго дéйства, во отгнáние и возбранéние злáго моегó и лукáваго обы́чая, во умерщвлéние страстéй, в снабдéние зáповедей Твои́х, в приложéние Божéственныя Твоея́ благодáти, и Твоегó Цáрствия присвоéние. Не бо я́ко презирáяй прихожду́ к Тебé, Христé Бóже, но я́ко дерзáя на неизречéнную Твою́ блáгость, и да не на мнóзе удаля́яйся общéния Твоегó, от мы́сленнаго вóлка звероуловлéн бу́ду. Тéмже молю́ся Тебé: я́ко еди́н сый Свят, Влады́ко, освяти́ мою́ ду́шу и тéло, ум и сéрдце, чревесá и утро́бы, и всего́ мя обнови́, и вкорени́ стрáх Твой во удесéх мои́х, и освящéние Твоé неотъéмлемо от менé сотвори́; и бу́ди ми помóщник и засту́пник, окормля́я в ми́ре живóт мой, сподобля́я мя и одесну́ю Тебé предстоя́ния со святы́ми Твои́ми, моли́твами и молéньми Пречи́стыя Твоея́ Мáтере, невещéственных Твои́х служи́телей и пречи́стых сил, и всех святы́х, от вéка Тебé благоугоди́вших. Ами́нь.

Молитва Симеона Метафраста, 3-я

Еди́не чи́стый и нетлéнный Гóсподи, за неизречéнную ми́лость человеколю́бия нáше все восприéмый смешéние, от чи́стых и дéвственных кровéй пáче естествá Рóждшия Тя, Ду́ха Божéственнаго нашéствием, и благоволéнием Отцá присносу́щнаго, Христé Иису́се, прему́дросте Бóжия, и ми́ре, и си́ло; Твои́м восприя́тием животворя́щая и спаси́тельная страдáния восприéмый, крест, гвóздия, копиé, смерть, умертви́ моя́ душетлéнныя стрáсти телéсныя. Погребéнием Твои́м áдова плени́вый цáрствия, погреби́ моя́ благи́ми помы́слы лукáвая совéтования, и лукáвствия ду́хи разори́. Триднéвным Твои́м и живонóсным воскресéнием пáдшаго прáотца возстáвивый, возстáви мя грехóм попóлзшагося, óбразы мне покая́ния предлагáя. Преслáвным Твои́м вознесéнием плотскóе обожи́вый восприя́тие, и сиé десны́м Отцá седéнием почты́й, сподóби мя причáстием святы́х Твои́х Тáин десну́ю часть спасáемых получи́ти. Сни́тием Утéшителя Твоего́ Ду́ха сосу́ды чéстны свящéнныя Твоя́ ученики́ содéлавый, прия́телище и менé покажи́ Тогó пришéствия. Хотя́й пáки приити́ суди́ти вселéнней прáвдою, благоволи́ и мне усрéсти Тя на óблацех, Судию́ и Создáтеля моегó, со всéми святы́ми Твои́ми: да безконéчно славослóвлю и воспевáю Тя со безначáльным Твои́м Отцéм и Пресвяты́м и Благи́м и Животворя́щим Твои́м Ду́хом, ны́не и при́сно и во вéки векóв. Ами́нь.

Молитва святого Иоанна Дамаскина, 4-я

Влады́ко Гóсподи Иису́се Христé, Бóже наш, еди́не имéяй власть человéком оставля́ти грехи́, я́ко благ и Человеколю́бец прéзри моя́ вся в вéдении и не в вéдении прегрешéния, и сподóби мя неосуждéнно причасти́тися Божéственных, и преслáвных, и пречи́стых, и животворя́щих Твои́х Тáин, не в тяжесть, ни в му́ку, ни в приложéние грехóв, но во очищéние, и освящéние, и обручéние бу́дущаго животá и Цáрствия, в стéну и пóмощь, и в возражéние сопроти́вных, во истреблéние мнóгих мои́х согрешéний. Ты бо еси́ Бог ми́лости, и щедрóт, и человеколю́бия, и Тебé слáву возсылáем со Отцéм и Святы́м Ду́хом, ны́не и при́сно и во вéки векóв. Ами́нь.

Молитва святого Василия Великого, 5-я

Вем, Гóсподи, я́ко недостóйне причащáюся пречи́стаго Твоегó Тéла и честны́я Твоея́ Крóве, и пови́нен есмь, и суд себé ям и пию́, не разсуждáя Тéла и Крóве Тебé Христá и Бóга моегó, но на щедрóты Твоя́ дерзáя прихожду́ к Тебé рéкшему: яды́й Мою́ плоть, и пия́й Мою́ кровь, во Мне пребывáет, и Аз в нем. Умилосéрдися у́бо, Гóсподи, и не обличи́ мя грéшнаго, но сотвори́ со мнóю по ми́лости Твоéй; и да бу́дут ми святáя сия́ во исцелéние, и очищéние, и просвещéние, и сохранéние, и спасéние, и во освящéние души́ и тéла; во отгнáние вся́каго мечтáния, и лукáваго дея́ния, и дéйства диáвольскаго, мы́сленне во удесéх мои́х дéйствуемаго, в дерзновéние и любóвь, я́же к Тебé; во исправлéние жития́ и утверждéние, в возращéние добродéтели и совершéнства; во исполнéние зáповедей, в Ду́ха Святáго общéние, в напу́тие животá вéчнаго, во отвéт благоприя́тен на Стрáшнем Суди́щи Твоéм: не в суд или́ во осуждéние.

Молитва святого Симеона Нового Богослова, 6-я

От сквéрных устéн, от мéрзкаго сéрдца, от нечи́стаго язы́ка, от души́ осквернéны, приими́ молéние, Христé мой, и не прéзри мои́х ни словéс, нижé образóв, нижé безсту́дия. Даждь ми дерзновéнно глагóлати, я́же хощу́, Христé мой, пáче же и научи́ мя, что ми подобáет твори́ти и глагóлати. Согреши́х пáче блудни́цы, я́же увéде, где обитáеши, ми́ро купи́вши, прии́де дéрзостне помáзати Твои́ нóзе, Бóга моегó, Влады́ки и Христá моегó. Я́коже óну не отри́нул еси́ пришéдшую от сéрдца, нижé менé возгнушáйся, Слóве: Твои́ же ми подáждь нóзе, и держáти и целовáти, и струя́ми слéзными, я́ко многоцéнным ми́ром, сия́ дéрзостно помáзати. Омы́й мя слезáми мои́ми, очи́сти мя и́ми, Слóве. Остáви и прегрешéния моя́, и прощéние ми подáждь. Вéси зол мнóжество, вéси и стру́пы моя́, и я́звы зри́ши моя́, но и вéру вéси, и произволéние зри́ши, и воздыхáние слы́шиши. Не таи́тся Тебé, Бóже мой, Твóрче мой, Избáвителю мой, нижé кáпля слéзная, нижé кáпли часть нéкая. Несодéланное моé ви́десте óчи Твои́, в кни́зе же Твоéй и ещé несодéянная напи́сана Тебé суть. Виждь смирéние моé, виждь труд мой ели́к, и грехи́ вся остáви ми, Бóже вся́ческих: да чи́стым сéрдцем, притрéпетною мы́слию, и душéю сокрушéнною, несквéрных Твои́х причащу́ся и пресвяты́х Тáин, и́миже оживля́ется и обожáется всяк яды́й же и пия́й чи́стым сéрдцем; Ты бо рекл еси́, Влады́ко мой: всяк яды́й Мою́ Плоть, и пия́й Мою́ Кровь, во Мне у́бо сей пребывáет, в нéмже и Аз есмь. И́стинно слóво вся́ко Влады́ки и Бóга моегó: Божéственных бо причащáяйся и боготворя́щих благодáтей, не у́бо есмь еди́н, но с Тобо́ю, Христé мой, Свéтом трисо́лнечным, просвещáющим мир. Да у́бо не еди́н пребу́ду кромé Тебé Живодáвца, дыхáния моегó, животá моегó, рáдования моегó, спасéния ми́ру. Сегó рáди к Тебé приступи́х, я́коже зри́ши, со слезáми, и душéю сокрушéнною, избавлéния мои́х прегрешéний прошу́ прия́ти ми, и Твои́х живодáтельных и непорóчных Тáинств причасти́тися неосуждéнно, да пребу́деши, я́коже рекл еси́, со мнóю треокая́нным: да не кромé обрéт мя Твоея́ благодáти, прелéстник восхи́тит мя льсти́вне, и прельсти́в отведéт боготворя́щих Твои́х словéс. Сегó рáди к Тебé припáдаю, и тéпле вопию́ Ти: я́коже блу́днаго прия́л еси́, и блудни́цу пришéдшую, тáко приими́ мя блу́днаго и сквéрнаго, Щéдре. Душéю сокрушéнною, ны́не бо к Тебé приходя́, вем, Спáсе, я́ко ины́й, я́коже аз, не прегреши́ Тебé, нижé содéя дея́ния, я́же аз содéях. Но сиé пáки вем, я́ко не вели́чество прегрешéний, ни грехóв мнóжество превосхóдит Бóга моегó мнóгое долготерпéние и человеколю́бие крáйнее; но ми́лостию сострáстия тéпле кáющияся, и чи́стиши, и свéтлиши, и свéта твори́ши причáстники, óбщники Божествá Твоегó содéловаяй незави́стно, и стрáнное и Áнгелом, и человéческим мы́слем, бесéдуеши им мнóгажды, я́коже другóм Твои́м и́стинным. Сия́ дéрзостна творя́т мя, сия́ вперя́ют мя, Христé мой. И дерзáя Твои́м богáтым к нам благодея́нием, рáдуяся вку́пе и трепещá, огнéви причащáюся травá сый, и стрáнно чу́до, орошáемь неопáльно, я́коже у́бо купинá дрéвле неопáльне горя́щи. Ны́не благодáрною мы́слию, благодáрным же сéрдцем, благодáрными удесы́ мои́ми, души́ и тéла моегó, покланя́юся и величáю, и славослóвлю Тя, Бóже мой, я́ко благословéнна су́ща, ны́не же и во вéки.

Молитва святого Иоанна Златоустого, 7-я

Бóже, ослáби, остáви, прости́ ми согрешéния моя́, ели́ка Ти согреши́х, áще слóвом, áще дéлом, áще помышлéнием, во́лею или́ нево́лею, рáзумом или́ неразу́мием, вся ми прости́ я́ко благ и Человеколю́бец, и моли́твами Пречи́стыя Твоея́ Мáтере, у́мных Твои́х служи́телей и святы́х сил, и всех святы́х, от вéка Тебé благоугоди́вших, неосуждéнно благоволи́ прия́ти ми святóе и пречи́стое Твоé Тéло и честну́ю Кровь, во исцелéние души́ же и тéла, и во очищéние лукáвых мои́х помышлéний. Я́ко Твоé есть Цáрство и си́ла и слáва, со Отцéм и Святы́м Ду́хом, ны́не и при́сно и во вéки векóв. Ами́нь.

Его же, 8-я

Несмь довóлен, Влады́ко Гóсподи, да вни́деши под кров души́ моея́; но понéже хóщеши Ты, я́ко Человеколю́бец, жи́ти во мне, дерзáя приступáю; повелевáеши, да отвéрзу двéри, я́же Ты еди́н создáл еси́, и вни́деши со человеколю́бием я́коже еси́, вни́деши и просвещáеши помрачéнный мой пóмысл. Вéрую, я́ко сиé сотвори́ши: не бо блудни́цу, со слезáми пришéдшую к Тебé, отгнáл еси́; нижé мытаря́ отвéргл еси́ покáявшася; нижé разбóйника, познáвша Цáрство Твоé, отгнáл еси́; нижé гони́теля покáявшася остáвил еси́, éже бе: но от покая́ния Тебé пришéдшия вся, в лицé Твои́х другóв вчини́л еси́, Еди́н сый благословéнный всегдá, ны́не и в безконéчныя вéки. Ами́нь.

Его же, 9-я

Гóсподи Иису́се Христé, Бóже мой, ослáби, остáви, очи́сти и прости́ ми грéшному, и непотрéбному, и недостóйному рабу́ Твоему́ прегрешéния, и согрешéния, и грехопадéния моя́, ели́ка Ти от ю́ности моея́, даже до настоя́щаго дне и чáса согреши́х: áще в рáзуме и в неразу́мии, áще в словесéх или дéлех, или́ помышлéниих и мы́слех, и начинáниих, и всех мои́х чу́вствах. И моли́твами безсéменно рóждшия Тя, Пречи́стыя и Приснодéвы Мари́и, Мáтере Твоея́, еди́ныя непосты́дныя надéжды и предстáтельства и спасéния моегó, сподóби мя неосуждéнно причасти́тися пречи́стых, безсмéртных, животворя́щих и стрáшных Твои́х Тáинств, во оставлéние грехóв и в жизнь вéчную: во освящéние, и просвещéние, крéпость, исцелéние, и здрáвие души́ же и тéла, и в потреблéние и всесовершéнное погублéние лукáвых мои́х пóмыслов, и помышлéний, и предприя́тий, и нощны́х мечтáний, тéмных и лукáвых духóв; я́ко Твоé есть Цáрство, и си́ла, и слáва, и честь, и поклонéние, со Отцéм и Святы́м Твои́м Ду́хом, ны́не и при́сно и во вéки векóв. Ами́нь.

Молитва святого Иоанна Дамаскина, 10-я

Пред двéрьми хрáма Твоегó предстою́, и лю́тых помышлéний не отступáю; но Ты, Христé Бóже, мытаря́ оправди́вый, и хананéю поми́ловавый, и разбóйнику рая́ двéри отвéрзый, отвéрзи ми утрóбы человеколю́бия Твоегó, и приими́ мя приходя́ща и прикасáющася Тебé, я́ко блудни́цу, и кровоточи́вую: óва у́бо крáя ри́зы Твоея́ косну́вшися, удобь исцелéние прия́т, óва же пречи́стеи Твои́ нóзе удержáвши, разрешéние грехóв понесé. Аз же, окая́нный, все Твоé Тéло дерзáя восприя́ти, да не опалéн бу́ду; но приими́ мя, я́коже óныя, и просвети́ моя́ душéвныя чу́вства, попаля́я моя́ грехóвныя вины́, моли́твами безсéменно Рóждшия Тя, и Небéсных Сил; я́ко Благословéн еси́ во вéки векóв. Ами́нь.

Молитва святого Иоанна Златоустого

Вéрую, Гóсподи, и исповéдую, я́ко Ты еси́ вои́стинну Христóс, Сын Бóга живáго, пришéдый в мир грéшныя спасти́, от ни́хже пéрвый есмь аз. Ещé вéрую, я́ко сиé есть сáмое пречи́стое Тéло Твоé, и сия́ есть сáмая честнáя Кровь Твоя́. Молю́ся у́бо Тебé: поми́луй мя, и прости́ ми прегрешéния моя́, вóльная и невóльная, я́же слóвом, я́же дéлом, я́же вéдением и невéдением, и сподóби мя неосуждéнно причасти́тися пречи́стых Твои́х Тáинств, во оставлéние грехóв, и в жизнь вéчную. Ами́нь.

Приходя же причаститься, произноси мысленно эти стихи Метафраста:

Се приступáю к Божéственному Причащéнию.

Содéтелю, да не опали́ши мя приобщéнием:

Огнь бо еси́, недостóйныя попаля́яй.

Но у́бо очи́сти мя от вся́кия сквéрны.

Затем:

Вéчери Твоея́ тáйныя днесь, Сы́не Бóжий, причáстника мя приими́; не бо врагóм Твои́м тáйну повéм, ни лобзáния Ти дам, я́ко Иу́да, но я́ко разбóйник исповéдаю Тя: помяни́ мя, Гóсподи, во Цáрствии Твоéм.

И стихи:

Боготворя́щую Кровь ужасни́ся, человéче, зря:

Огнь бо есть, недостóйныя попаля́яй.

Божéственное Тéло и обожáет мя и питáет:

Обожáет дух, ум же питáет стрáнно.

Потом тропари:

Услади́л мя еси́ любóвию, Христé, и измени́л мя еси́ Божéственным Твои́м рачéнием; но попали́ огнéм невещéственным грехи́ моя́, и насы́титися éже в Тебé наслаждéния сподóби: да лику́я возвеличáю, Блáже, два пришéствия Твоя́.

Во свéтлостех святы́х Твои́х кáко вни́ду, недостóйный? Áще бо дерзну́ совни́ти в чертóг, одéжда мя обличáет, я́ко нéсть брáчна, и свя́зан извéржен бу́ду от Áнгелов. Очи́сти, Гóсподи, сквéрну души́ моея́, и спаси́ мя, я́ко Человеколю́бец.

Также молитву:

Влады́ко Человеколю́бче, Гóсподи Иису́се Христé Бóже мой, да не в суд ми бу́дут Святáя сия́, за éже недостóйну ми бы́ти: но во очищéние и освящéние души́ же и тéла, и во обручéние бу́дущия жи́зни и Цáрствия. Мне же, éже прилепля́тися Бóгу, блáго есть, полагáти во Гóсподе уповáние спасéния моегó.

И еще:

Вéчери Твоея́ тáйныя днесь, Сы́не Бóжий, причáстника мя приими́ не бо врагóм Твои́м тáйну повéм, ни лобзáния Ти дам, я́ко Иу́да, но я́ко разбóйник исповéдаю Тя: помяни́ мя, Гóсподи, во Цáрствии Твоéм.

По благословению духовника правило может быть сокращено или заменено на более короткие молитвы тем христианам, которые тяжело больны или по другим причинам не в состоянии прочитать священные тексты в полном объеме.

Желательным, но не обязательным является чтение канонов Спасителю, Божьей Матери, Ангелу Хранителю.

Канон покаянный ко Господу нашему Иисусу Христу

Глас 6-й

Песнь 1

Ирмос: Я́ко по сýху пешешéствовав Изрáиль, по бéздне стопáми, гони́теля фараóна ви́дя потопля́ема, Бóгу побéдную песнь пои́м, вопия́ше.

Припев: Поми́луй мя, Бóже, поми́луй мя.

Ны́не приступи́х аз грéшный и обременéнный к Тебé, Влады́це и Бóгу моемý; не смéю же взирáти на нéбо, то́кмо молю́ся, глаго́ля: даждь ми, Гóсподи, ум, да плáчуся дел мои́х гóрько.

Поми́луй мя, Бóже, поми́луй мя.

О, гóре мне грéшному! Пáче всех человéк окая́нен есмь, покая́ния несть во мне; даждь ми, Гóсподи, слéзы, да плáчуся дел мои́х гóрько.

Слава: Безýмне, окая́нне человéче, в лéности врéмя губи́ши; помы́сли житиé твоé, и обрати́ся ко Гóсподу Бóгу, и плáчися о дéлех твои́х гóрько.

И ныне: Мáти Бóжия Пречи́стая, воззри́ на мя грéшнаго, и от сéти диáволи избáви мя, и на путь покая́ния настáви мя, да плáчуся дел мои́х гóрько.

Песнь 3

Ирмос: Несть свят, я́коже Ты, Го́споди Бо́же мой, вознесы́й рог вéрных Твои́х, Блáже, и утверди́вый нас на кáмени исповéдания Твоегó.

Поми́луй мя, Бóже, поми́луй мя.

Внегдá постáвлени бýдут престóли на суди́щи стрáшнем, тогдá всех человéк делá обличáтся; гóре тáмо бýдет грéшным, в мýку отсылáемым; и то вéдущи, душé моя́, покáйся от злых дел твои́х.

Поми́луй мя, Бóже, поми́луй мя.

Пра́ведницы возра́дуются, а грéшнии воспла́чутся, тогда́ никто́же возмо́жет помощи́ нам, но дела́ на́ша осу́дят нас; тéмже прéжде конца́ пока́йся от злых дел твои́х.

Слава: Увы́ мне великогрéшному, и́же дéлы и мы́сльми оскверни́вся, ни кáпли слез имéю от жестосéрдия; ны́не возни́кни от земли́, душé моя́, и покáйся от злых дел твои́х.

И ныне: Се, взывáет, Госпожé, Сы́н Твой, и поучáет нас на дóброе, аз же грéшный добрá всегдá бéгаю; но Ты, Ми́лостивая, поми́луй мя, да покáюся от злых мои́х дел.

Седален, глас 6-й

Помышля́ю день стрáшный и плáчуся дея́ний мои́х лукáвых: кáко отвещáю Безсмéртному Царю́, или кóим дерзновéнием воззрю́ на Сýдию, блýдный аз? Благоутрóбный Отче, Сы́не Единорóдный и Дýше Святы́й, поми́луй мя.

Слáва, и ны́не:

Богородичен: Свя́зан мнóгими ны́не плени́цами грехóв и содержи́мь лю́тыми страстьми́ и бедáми, к Тебé прибегáю, моемý спасéнию, и вопию́: помоги́ ми, Дéво, Мáти Бóжия.

Песнь 4

Ирмос: Христо́с моя́ си́ла, Бог и Госпóдь, честнáя Цéрковь боголéпно поéт, взывáющи от смы́сла чи́ста, о Гóсподе прáзднующи.

Поми́луй мя, Бóже, поми́луй мя.

Ширóк путь зде и угóдный слáсти твори́ти, но гóрько бýдет в послéдний день, егдá душá от тéла разлучáтися бýдет: блюди́ся от сих, человéче, Цáрствия рáди Бо́жия.

Поми́луй мя, Бóже, поми́луй мя.

Почтó убóгаго оби́диши, мздý наéмничу удéржуеши, брáта твоегó не лю́биши, блуд и гóрдость гóниши? Остáви ýбо сия́, душé моя́, и покáйся Цáрствия рáди Бóжия.

Слава: О, безýмныи́ человéче, докóле углебáеши, я́ко пчелá, собирáющи богáтство твоé? Вскóре бо поги́бнет, я́ко прах и пéпел: но бóлее взыщи́ Цáрствия Бóжия.

И ныне: Госпожé Богорóдице, поми́луи́ мя грéшнаго, и в добродéтели укрепи́, и соблюди́ мя, да нáглая смерть не похи́тит мя неготóваго; и доведи́ мя, Дéво, Цáрствия Бóжия.

Песнь 5

Ирмос: Бóжиим свéтом Твои́м, Блáже, ýтренюющих Ти дýши любóвию озари́, молю́ся, Тя вéдети, Слóве Бóжий, и́стиннаго Бóга, от мрáка грехóвнаго взывáюща.

Поми́луй мя, Бóже, поми́луй мя.

Воспомяни́, окая́нный человéче, кáко лжам, клеветáм, разбóю, нéмощем, лю́тым зверéм, грехóв рáди порабощéн еси́; душé моя́ грéшная, тогó ли восхотéла еси́?

Поми́луй мя, Бóже, поми́луй мя.

Трепéщут ми ýди, всéми бо сотвори́х винý: очи́ма взирáяй, уши́ма слы́шай, язы́ком злáя глагóляй, всегó себé геéнне предая́й; душé моя́ грéшная, сегó ли восхотéла еси́?

Слава: Блудникá и разбóйника кáющася прия́л еси́, Спáсе, аз же еди́н лéностию грехóвною отягчи́хся и злым делóм поработи́хся; душé моя́ грéшная, сегó ли восхотéла еси́?

И ныне: Ди́вная и ско́рая помо́щнице всем человéком, Мáти Бóжия, помози́ мне недостóйному, душá бо моя́ грéшная того восхотé.

Песнь 6

Ирмос: Житéйское мóре, воздвизáемое зря напáстей бýрею, к ти́хому пристáнищу Твоемý притéк, вопию́ Ти: возведи́ от тли живóт мой, Многоми́лостиве.

Поми́луй мя, Бóже, поми́луй мя.

Житиé на земли́ блýдно пожи́х и дýшу во тьму предáх, ны́не ýбо молю́ Тя, Ми́лостивый Влады́ко: свободи́ мя от рабóты сея́ врáжия, и даждь ми рáзум твори́ти вóлю Твою́.

Поми́луй мя, Бóже, поми́луй мя.

Кто твори́т таковáя, я́коже аз? Якоже бо свиния́ лежи́т в калý, тáко и аз грехý служý. Но Ты, Гóсподи, истóргни мя от гнýса сегó и даждь ми сéрдце твори́ти зáповеди Твоя́.

Слава: Воспряни́, окая́нный человéче, к Бóгу, воспомянýв своя́ согрешéния, припáдая ко Творцý, слезя́ и стеня́; Той же, я́ко милосéрд, даст ти ум знáти вóлю Свою́.

И ныне: Богорóдице Дéво, от ви́димаго и неви́димаго зла сохрани́ мя, Пречи́стая, и приими́ моли́твы моя́, и донеси́ я Сы́ну Твоéму, да даст ми ум твори́ти вóлю Его.

Кондак

Душé моя́, почтó грехáми богатéеши, почтó вóлю диáволю твори́ши, в чесóм надéжду полагáеши? Престáни от сих и обрати́ся к Бóгу с плáчем, зовýщи: Милосéрде Гóсподи, поми́луй мя грéшнаго.

Икос

Помы́сли, душé моя́, гóрький час смéрти и Стрáшный Суд Творцá твоегó и Бóга: Ангели бо грóзнии пóймут тя, душé, и в вéчный огнь введýт: ýбо прéжде смéрти покáйся, вопию́щи: Гóсподи, поми́луй мя грéшнаго.

Песнь 7

Ирмос: Росодáтельну ýбо пещь содéла Ангел преподóбным отрокóм, халдеи́ же опаля́ющее велéние Бóжие, мучи́теля увещá вопи́ти: благословéн еси́, Бóже отéц нáших.

Поми́луй мя, Бóже, поми́луй мя.

Не надéйся, душé моя́, на тлéнное богáтство и на непрáведное собрáние, вся бо сия́ не вéси кому остáвиши, но возопи́й: поми́луй мя, Христé Бóже, недостóйнаго.

Поми́луй мя, Бóже, поми́луй мя.

Не уповáй, душé моя́, на телéсное здрáвие и на скоромимоходя́щую красотý, ви́диши бо, я́ко си́льнии и млади́и умирáют, но возопи́й: поми́луй мя, Христé Бóже, недостóйнаго.

Слава: Воспомяни́, душé моя́, вéчное житиé, Цáрство Небéсное, уготóванное святы́м, и тьму кромéшную и гнев Бóжий злым, и возопи́й: поми́луй мя, Христé Бóже, недостóйнаго.

И ныне: Припади́, душé моя́, к Бóжией Мáтери и помоли́ся Той, есть бо скóрая Помóщница кáющимся, умóлит Сы́на Христá Бóга, и поми́лует мя недостóйнаго.

Песнь 8

Ирмос: Из плáмене преподóбным рóсу источи́л еси́ и прáведнаго жéртву водóю попали́л еси́: вся бо твори́ши, Христé, тóкмо éже хотéти. Тя превознóсим во вся вéки.

Поми́луй мя, Бóже, поми́луй мя.

Кáко не и́мам плáкатися, егдá помышля́ю смерть, ви́дех бо во грóбе лежáща брáта моегó, безслáвна и безобрáзна? Что ýбо чáю, и на что надéюся? Тóкмо даждь ми, Гóсподи, прéжде концá покая́ние. (Дважды)

Слава: Вéрую, я́ко прии́деши суди́ти живы́х и мéртвых, и вси во своéм чинý стáнут, стáрии и млади́и, влады́ки и кня́зи, дéвы и свящéнницы; где обря́щуся аз? Сего́ рáди вопию́: даждь ми, Гóсподи, прéжде концá покая́ние.

И ныне: Пречи́стая Богорóдице, приими́ недостóйную моли́тву мою́ и сохрани́ мя от нáглыя смéрти, и дáруй ми прéжде концá покая́ние.

Песнь 9

Ирмос: Бóга человéком невозмóжно ви́дети, на Негóже не смéют чи́ни áнгельстии взирáти; Тобóю же, Всечи́стая, яви́ся человéком Слóво Воплощéнно, Егóже величáюще, с небéсными вóи Тя ублажáем.

Поми́луй мя, Бóже, поми́луй мя.

Ны́не к вам прибегáю, Ангели́, Архáнгели и вся Небéсныя Си́лы, у Престóла Бóжия стоя́щии, моли́теся ко Творцý своемý, да избáвит дýшу мою́ от мýки вéчныя.

Поми́луй мя, Бóже, поми́луй мя.

Ны́не плáчуся к вам, святи́и патриáрси, цáрие и прорóцы, апóстоли и святи́телие и вси избрáннии Христóвы: помози́те ми на судé, да спасéт дýшу мою́ от си́лы врáжия.

Слава: Ны́не к вам воздежý рýце, свя́тии мýченицы, пусты́нницы, дéвственницы, прáведницы и вси святи́и, моля́щиися ко Гóсподу за весь мир, да поми́лует мя в час смéрти моея́.

И ныне: Мáти Бóжия, помози́ ми, на Тя си́льне надéющемуся, умоли́ Сы́на Своегó, да постáвит мя недостóйнаго одеснýю Себé, егдá ся́дет судя́й живы́х и мéртвых, ами́нь.

Молитва

Влады́ко Христé Бóже, Иже страстьми́ Свои́ми стрáсти моя́ исцели́вый и я́звами Свои́ми я́звы моя́ уврачевáвый, дáруй мне, мнóго Тебé прегреши́вшему, слéзы умилéния; сраствори́ моемý тéлу от обоня́ния Животворя́щаго Тéла Твоегó, и наслади́ дýшу мою́ Твоéю Честнóю Крóвию от гóрести, éюже мя сопроти́вник напои́; возвы́си мой ум к Тебé, дóлу пони́кший, и возведи́ от прóпасти поги́бели: я́ко не и́мам покая́ния, не и́мам умилéния, не и́мам слéзы утéшительныя, возводя́щия чáда ко своемý наслéдию. Омрачи́хся умóм в житéйских страстéх, не могý воззрéти к Тебé в болéзни, не могý согрéтися слезáми, я́же к Тебé любвé. Но, Влады́ко Гóсподи Иисýсе Христé, сокрóвище благи́х, дáруй мне покая́ние всецéлое и сéрдце люботрýдное во взыскáние Твоé, дáруй мне благодáть Твою́ и обнови́ во мне зрáки Твоегó óбраза. Остáвих Тя, не остáви менé; изы́ди на взыскáние моé, возведи́ к пáжити Твоéй и сопричти́ мя овцáм избрáннаго Твоегó стáда, воспитáй мя с ни́ми от злáка Божéственных Твои́х Тáинств, моли́твами Пречи́стыя Твоея́ Мáтере и всех святы́х Твои́х. Ами́нь.

Канон молебный ко Пресвятой Богородице, поемый во всякой скорби душевной и обстоянии

Глас 8-й

Песнь 1

Ирмос: Вóду прошéд я́ко су́шу, и еги́петскаго зла избежáв, изрáильтянин вопия́ше: Избáвителю и Бóгу нáшему пои́м.

Припев: Пресвятáя Богорóдице, спаси́ нас.

Мнóгими содержи́мь напáстьми, к Тебé прибегáю, спасéния иски́й: о, Мáти Слóва и Дéво, от тя́жких и лю́тых мя спаси́.

Пресвятáя Богорóдице, спаси́ нас.

Страстéй мя смущáют прилóзи, мнóгаго уны́ния испóлнити мою ду́шу; умири́, Отрокови́це, тишинóю Сы́на и Бóга Твоегó, Всенепорóчная.

Слава: Спáса рóждшую Тя и Бóга, молю́, Дéво, избáвитися ми лю́тых: к Тебé бо ны́не прибегáя, простирáю и ду́шу и помышлéние.

И ныне: Неду́гующа тéлом и душéю, посещéния Божéственнаго и промышлéния от Тебé сподóби, Еди́на Богомáти, я́ко Благáя, Благáго же Роди́тельница.

Песнь 3

Ирмос: Небéснаго кру́га Верхотвóрче Гóсподи, и Цéркве Зижди́телю, Ты менé утверди́ в любви́ Твоéй, желáний крáю, вéрных утверждéние, еди́не Человеколю́бче.

Пресвятáя Богорóдице, спаси́ нас.

Предстáтельство и покрóв жи́зни моея́ полагáю Тя, Богороди́тельнице Дéво: Ты мя окорми́ ко пристáнищу Твоему́, благи́х винóвна, вéрных утверждéние, еди́на Всепéтая.

Пресвятáя Богорóдице, спаси́ нас.

Молю́, Дéво, душéвное смущéние и печáли моея́ бу́рю разори́ти: Ты бо, Богоневéстная, начáльника тишины́ Христá родилá еси́, еди́на Пречи́стая.

Слава: Благодéтеля рóждши дóбрых винóвнаго, благодея́ния богáтство всем источи́, вся бо мóжеши, я́ко сильнаго в крéпости Христá рóждши, Богоблажéнная.

И ныне: Лю́тыми неду́ги и болéзненными страстьми́ истязáему, Дéво, Ты ми помози́: исцелéний бо неоску́дное Тя знáю сокрóвище, Пренепорóчная, неиждивáемое.

Если молебен, то поем стихи:

Спаси́ от бед рабы́ Твоя́, Богорóдице, я́ко вси по Бóзе к Тебé прибегáем, я́ко неруши́мей стенé и предстáтельству.

При́зри благосéрдием, всепéтая Богорóдице, на моé лю́тое телесé озлоблéние, и исцели́ души́ моея́ болéзнь.

Тропарь, глас 2-й

Молéние тéплое и стенá необори́мая, ми́лости истóчниче, ми́рови прибéжище, прилéжно вопиéм Ти: Богорóдице Влады́чице, предвари́, и от бед избáви нас, еди́на вскóре предстáтельствующая.

Песнь 4

Ирмос: Услы́шах, Гóсподи, смотрéния Твоегó тáинство, разумéх делá Твоя́ и прослáвих Твоé Божествó.

Пресвятáя Богорóдице, спаси́ нас.

Страстéй мои́х смущéние, кóрмчию рóждшая Гóспода, и бу́рю ути́ши мои́х прегрешéний, Богоневéстная.

Пресвятáя Богорóдице, спаси́ нас.

Милосéрдия Твоегó бéздну призывáющу подáждь ми, Яже Благосéрдаго рóждшая и Спáса всех пою́щих Тя.

Пресвятáя Богорóдице, спаси́ нас.

Наслаждáющеся, Пречи́стая, Твои́х даровáний, благодáрственное воспевáем пéние, вéдуще Тя Богомáтерь.

Слава: На одрé болéзни моея́ и нéмощи низлежáщу ми, яко Боголюби́ва, помози́, Богородице, еди́на Приснодéво.

И ныне: Надéжду и утверждéние и спасéния стéну недви́жиму иму́ще Тя, Всепéтая, неудóбства вся́каго избавля́емся.

Песнь 5

Ирмос: Просвети́ нас повелéнии Твои́ми, Гóсподи, и мы́шцею Твоéю высóкою Твой мир подáждь нам, Человеколю́бче.

Пресвятáя Богорóдице, спаси́ нас.

Испóлни, Чи́стая, весéлия сéрдце моé, Твою́ нетлéнную даю́щи рáдость, весéлия рóждшая винóвнаго.

Пресвятáя Богорóдице, спаси́ нас.

Избáви нас от бед, Богорóдице Чи́стая, вéчное рóждши избавлéние, и мир, всяк ум преиму́щий.

Слава: Разреши́ мглу прегрешéний мои́х, Богоневéсто, просвещéнием Твоея́ свéтлости, Свет рóждшая Божéственный и превéчный.

И ныне: Исцели́, Чи́стая, души́ моея́ неможéние, посещéния Твоегó сподóбльшая, и здрáвие моли́твами Твои́ми подáждь ми.

Песнь 6

Ирмос: Моли́тву пролию́ ко Гóсподу, и Тому́ возвещу́ печáли моя́, я́ко зол душá моя́ испóлнися, и живóт мой áду прибли́жися, и молю́ся я́ко Иóна: от тли, Бóже, возведи́ мя.

Пресвятáя Богорóдице, спаси́ нас.

Смéрти и тли я́ко спасл есть, Сам Ся издáв смéрти, тлéнием и смéртию моé естествó я́то бы́вшее, Дéво, моли́ Гóспода и Сы́на Твоегó, врагóв злодéйствия мя избáвити.

Пресвятáя Богорóдице, спаси́ нас.

Предстáтельницу Тя животá вем и Храни́тельницу твéрду, Дéво, и напáстей решáщу молвы́, и налóги бесóв отгоня́ющу; и молю́ся всегдá, от тли страстéй мои́х избáвити мя.

Слава: Яко стéну прибéжища стяжáхом, и душ всесовершéнное спасéние, и прострáнство в скóрбех, Отрокови́це, и просвещéнием Твои́м при́сно рáдуемся: о, Влады́чице, и ны́не нас от страстéй и бед спаси́.

И ныне: На одрé ны́не немощству́яй лежу́, и несть исцелéния плóти моéй: но, Бóга и Спáса ми́ру и Избáвителя неду́гов рóждшая, Тебé молю́ся, Благóй: от тли неду́г возстáви мя.

Кондак, глас 6-й

Предстáтельство христиан непосты́дное, ходáтайство ко Творцу́ непрелóжное, не прéзри грéшных молéний глáсы, но предвари́, я́ко Благáя, на пóмощь нас, вéрно зову́щих Ти; ускори́ на моли́тву, и потщи́ся на умолéние, предстáтельствующи при́сно, Богорóдице, чту́щих Тя.

Другой кондак, глас тот же

Не и́мамы ины́я пóмощи, не и́мамы ины́я надéжды, рáзве Тебé, Пречи́стая Дéво. Ты нам помози́, на Тебé надéемся, и Тобóю хвáлимся, Твои́ бо есмы́ рабы́, да не постыди́мся.

Стихира, глас тот же

Не ввéри мя человéческому предстáтельству, Пресвятáя Влады́чице, но приими́ молéние рабá Твоегó: скорбь бо обдержи́т мя, терпéти не могу дéмонскаго стреля́ния, покрóва не и́мам, нижé где прибéгну окая́нный, всегдá побеждáемь, и утешéния не и́мам, рáзве Тебé, Влады́чице ми́ра, уповáние и предстáтельство вéрных, не прéзри молéние моé, полéзно сотвори́.

Песнь 7

Ирмос: От Иудéи дошéдше óтроцы, в Вавилóне иногдá, вéрою Трóическою плáмень пéщный попрáша, пою́ще: отцéв Бóже, благословéн еси́.

Пресвятáя Богорóдице, спаси́ нас.

Нáше спасéние я́коже восхотéл еси́, Спáсе, устрóити, во утрóбу Дéвыя всели́лся еси́, Юже ми́ру предстáтельницу показáл еси́: отéц нáших Бóже, благословéн еси́.

Пресвятáя Богорóдице, спаси́ нас.

Воли́теля ми́лости, Егóже родилá еси́, Мáти чи́стая, умоли́ избáвитися от прегрешéний и душéвных скверн вéрою зову́щим: отéц нáших Бóже, благословéн еси́.

Слава: Сокрóвище спасéния и Истóчник нетлéния, Тя рóждшую, и столп утверждéния, и дверь покая́ния, зову́щим показáл еси́: отéц нáших Бóже, благословéн еси́.

И ныне: Телéсныя слáбости и душéвныя неду́ги, Богороди́тельнице, любóвию приступáющих к крóву Твоéму, Дéво, исцели́ти сподóби, Спáса Христá нам рóждшая.

Песнь 8

Ирмос: Царя́ Небéснаго, Егóже пою́т во́и áнгельстии, хвали́те и превозноси́те во вся вéки.

Пресвятáя Богорóдице, спаси́ нас.

Пóмощи я́же от Тебé трéбующия не прéзри, Дéво, пою́щия и превознося́щия Тя во вéки.

Пресвятáя Богорóдице, спаси́ нас.

Неможéние души́ моея́ исцеля́еши и телéсныя болéзни, Дéво, да Тя прослáвлю, Чи́стая, во вéки.

Слава: Исцелéний богáтство изливáеши вéрно пою́щим Тя, Дéво, и превознося́щим неизречéнное Твоé рождество́.

И ныне: Напáстей Ты прилóги отгоня́еши и страстéй нахóды, Дéво: тéмже Тя поéм во вся вéки.

Песнь 9

Ирмос: Вои́стинну Богорóдицу Тя исповéдуем, спасéннии Тобóю, Дéво Чи́стая, с безплóтными ли́ки Тя величáюще.

Пресвятáя Богорóдице, спаси́ нас.

Тóка слез мои́х не отврати́ся, Яже от вся́каго лицá вся́ку слéзу, отъéмшаго, Дéво, Христá рóждшая.

Пресвятáя Богорóдице, спаси́ нас.

Рáдости моé сéрдце испóлни, Дéво, Яже рáдости приéмшая исполнéние, грехóвную печáль потребля́ющи.

Пресвятáя Богорóдице, спаси́ нас.

Пристáнище и предстáтельство к Тебé прибегáющих бу́ди, Дéво, и стенá неруши́мая, прибéжище же и покрóв и весéлие.

Слава: Свéта Твоегó заря́ми просвети́, Дéво, мрак невéдения отгоня́ющи, благовéрно Богорóдицу Тя исповéдающих.

И ныне: На мéсте озлоблéния нéмощи смири́вшагося, Дéво, исцели́, из нездрáвия во здрáвие претворя́ющи.

Стихиры, глас 2-й

Вы́сшую небéс и чи́стшую свéтлостей сóлнечных, избáвльшую нас от кля́твы, Влады́чицу ми́ра пéсньми почти́м.

От мнóгих мои́х грехóв немощству́ет тéло, немощству́ет и душá моя́; к Тебé прибегáю, Благодáтней, надéждо ненадéжных, Ты ми помози́.

Влады́чице и Мáти Избáвителя, приими́ молéние недостóйных раб Твои́х, да ходáтайствуеши к Рóждшемуся от Тебé; о, Влады́чице ми́ра, бу́ди Ходáтаица!

Поéм прилéжно Тебé песнь ны́не, Всепéтой Богорóдице, рáдостно: со Предтéчею и всéми святы́ми моли́, Богорóдице, éже ущéдрити ны.

Вся Ангелов вóинства, Предтéче Госпóдень, апóстолов двоенадеся́тице, святи́и вси с Богорóдицею, сотвори́те моли́тву, во éже спасти́ся нам.

Молитвы ко Пресвятой Богородице

Цари́це моя́ преблагáя, надéждо моя́ Богорóдице, прия́телище си́рых и стрáнных Предстáтельнице, скорбя́щих рáдосте, оби́димых Покрови́тельнице! Зри́ши мою́ беду́, зри́ши мою́ скорбь, помози́ ми я́ко нéмощну, окорми́ мя я́ко стрáнна. Оби́ду мою́ вéси, разреши́ ту, я́ко вóлиши: я́ко не и́мам ины́я пóмощи рáзве Тебé, ни ины́я Предстáтельницы, ни Благи́я Утéшительницы, тóкмо Тебé, о Богомáти, я́ко да сохрани́ши мя и покры́еши во вéки векóв. Ами́нь.

К кому́ возопию́, Влады́чице? К кому́ прибéгну в гóрести моéй, áще не к Тебé, Цари́це Небéсная? Кто плач мой и воздыхáние моé прии́мет, áще не Ты, Пренепорóчная, надéждо христиáн и прибéжище нам грéшным? Кто пáче Тебé в напáстех защити́т? Услы́ши у́бо стенáние моé, и приклони́ у́хо Твоé ко мне, Влады́чице Мáти Бóга моегó, и не прéзри менé, трéбующаго Твоея́ пóмощи, и не отри́ни менé грéшнаго. Вразуми́ и научи́ мя, Цари́це Небéсная; не отступи́ от менé рабá Твоегó, Влады́чице, за роптáние моé, но бу́ди мне Мáти и Засту́пница. Вручáю себé ми́лостивому покрóву Твоему́: приведи́ мя грéшнаго к ти́хой и безмятéжней жи́зни, да плáчуся о гресéх мои́х. К кому́ бо прибегну пови́нный аз, áще не к Тебé, уповáнию и прибéжищу грéшных, надéждою на неизречéнную ми́лость Твою́ и щедрóты Твоя́ окриля́емь? О, Влады́чице Цари́це Небéсная! Ты мне уповáние и прибéжище, покрóв и заступлéние и пóмощь. Цари́це моя́ Преблагáя и скóрая Засту́пнице! Покры́й Твои́м ходáтайством моя́ прегрешéния, защити́ менé от враг ви́димых и неви́димых; умягчи́ сердцá злых человéк, возстаю́щих на мя. О, Мáти Гóспода моегó Творцá! Ты еси́ кóрень дéвства и неувядáемый цвет чистоты́. О, Богороди́тельнице! Ты подáждь ми пóмощь немощству́ющему плотски́ми страстьми́ и болéзнующему сéрдцем, еди́но бо Твоé и с Тобóю Твоегó Сы́на и Бóга нáшего и́мам заступлéние; и Твои́м пречу́дным заступлéнием да избáвлюся от вся́кия беды́ и напáсти, о Пренепорóчная и Преслáвная Бóжия Мáти Мари́е. Тéмже со уповáнием глагóлю и вопию́: рáдуйся, благодáтная, рáдуйся, обрáдованная; рáдуйся, преблагословéнная, Гóсподь с Тобóю.

Канон Ангелу хранителю

Тропарь, глас 6-й

Ангеле Бóжий, храни́телю мой святы́й, живóт мой соблюди́ во стрáсе Христá Бóга, ум мой утверди́ во и́стиннем пути́, и к любви́ гóрней уязви́ ду́шу мою́, да тобóю направля́емь, получу́ от Христá Бóга вéлию ми́лость.

Слáва, и ны́не:

Богородичен: Святáя Влады́чице, Христá Бóга нáшего Мáти, я́ко всех Творцá недоумéнно рóждшая, моли́ блáгость Егó всегдá, со храни́телем мои́м Ангелом, спасти́ ду́шу мою́, страстьми́ одержи́мую, и оставлéние грехóв даровáти ми.

Глас 8-й

Песнь 1

Ирмос: Пои́м Гóсподеви, провéдшему лю́ди Своя́ сквозé Чермнóе мóре, я́ко еди́н слáвно прослáвися.

Иису́су: Гóсподи Иису́се Христé Бóже мой, поми́луй мя.

Песнь воспéти и восхвали́ти, Спáсе, Твоегó рабá достóйно сподóби, безплóтному Ангелу, настáвнику и храни́телю моему́.

Святы́й Ангеле Бóжий, храни́телю мой, моли́ Бóга о мне.

Еди́н аз в неразу́мии и в лéности ны́не лежу́, настáвниче мой и храни́телю, не остáви менé погибáюща.

Слава: Ум мой твоéю моли́твою напрáви, твори́ти ми Бóжия повелéния, да получу́ от Бóга отдáние грехóв, и ненави́дети ми злых настáви мя, молю́ся ти.

И ныне: Моли́ся, Деви́це, о мне, рабé Твоéм, ко Благодáтелю, со храни́телем мои́м Ангелом, и настáви мя твори́ти зáповеди Сы́на Твоегó и Творцá моегó.

Песнь 3

Ирмос: Ты еси́ утверждéние притекáющих к Тебé, Гóсподи, Ты еси́ свет омрачéнных, и поéт Тя дух мой.

Святы́й Ангеле Бóжий, храни́телю мой, моли́ Бóга о мне.

Все помышлéние моé и ду́шу мою́ к тебе возложи́х, храни́телю мой; ты от вся́кия мя напáсти врáжия избáви.

Святы́й Áнгеле Бóжий, храни́телю мой, моли́ Бóга о мне.

Враг попирáет мя, и озлобля́ет, и поучáет всегдá твори́ти своя́ хотéния; но ты, настáвниче мой, не остáви менé погибáюща.

Слава: Пéти песнь со благодарéнием и усéрдием Творцу́ и Бóгу даждь ми, и тебé, благóму Ангелу, храни́телю моему́: избáвителю мой, изми́ мя от враг озлобля́ющих мя.

И ныне: Исцели́, Пречи́стая, моя́ многонеду́жныя стру́пы, я́же в души́, прожени́ враги́, и́же при́сно бóрются со мнóю.

Седален, глас 2-й

От любвé душéвныя вопию́ ти, храни́телю моея́ души́, всесвяты́й мой Ангеле: покры́й мя и соблюди́ от лукáваго ловлени́я всегдá, и к жи́зни настáви небéсней, вразумля́я и просвещáя и укрепля́я мя.

Слáва, и ны́не:

Богородичен: Богорóдице безневéстная Пречи́стая, Яже без сéмене рóждши всех Влады́ку, Тогó со Ангелом, храни́телем мои́м моли́, избáвити ми ся вся́каго недоумéния, и дáти умилéние и свет души́ моéй и согрешéнием очищéние, Яже еди́на вскóре заступáющи.

Песнь 4

Ирмос: Услы́шах, Гóсподи, смотрéния Твоегó тáинство, разумéх делá Твоя́, и прослáвих Твоé Божествó.

Святы́й Ангеле Бóжий, храни́телю мой, моли́ Бóга о мне.

Моли́ Человеколю́бца Бóга ты, храни́телю мой, и не остáви менé, но при́сно в ми́ре житиé моé соблюди́ и подáждь ми спасéние необори́мое.

Святы́й Ангеле Бóжий, храни́телю мой, моли́ Бóга о мне.

Яко засту́пника и храни́теля животу́ моему́ приéм тя от Бóга, Ангеле, молю́ тя, святы́й, от вся́ких мя бед свободи́.

Слава: Мою́ сквéрность твоéю святы́нею очи́сти, храни́телю мой, и от чáсти шу́ия да отлучéн бу́ду моли́твами твои́ми и причáстник слáвы явлю́ся.

И ныне: Недоумéние предлежи́т ми от обышéдших мя зол, Пречи́стая, но избáви мя от них скóро: к Тебé бо еди́ней прибегóх.

Песнь 5

Ирмос: Утренююще вопиéм Ти: Го́споди, спаси́ ны; Ты бо ecи́ Бог наш, рáзве Тебé инóго не вéмы.

Святы́й Ангеле Бóжий, храни́телю мой, моли́ Бóга о мне.

Яко имéя дерзновéние к Бóгу, храни́телю мой святы́й, Сегó умоли́ от оскорбля́ющих мя зол избáвити.

Святы́й Ангеле Бóжий, храни́телю мой, моли́ Бóга о мне.

Свéте свéтлый, свéтло просвети́ ду́шу мою́, настáвниче мой и храни́телю, от Бóга дáнный ми Ангеле.

Слава: Спя́ща мя зле тяготóю грехóвною, я́ко бдя́ща сохрани́, Ангеле Бóжий, и возстáви мя на славослóвие молéнием твои́м.

И ныне: Мари́е, Госпожé Богорóдице безневéстная, надéждо вéрных, врáжия возношéния низложи́, пою́щия же Тя возвесели́.

Песнь 6

Ирмос: Ри́зу мне подáждь свéтлу, одея́йся свéтом я́ко ри́зою, многоми́лостиве Христé Бóже наш.

Святы́й Ангеле Бóжий, храни́телю мой, моли́ Бóга о мне.

Вся́ких мя напáстей свободи́, и от печáлей спаси́, молю́ся ти, святы́й Ангеле, дáнный ми от Бóга, храни́телю мой дóбрый.

Святы́й Ангеле Бóжий, храни́телю мой, моли́ Бóга о мне.

Освети́ ум мой, блáже, и просвети́ мя, молю́ся ти, святы́й Ангеле, и мы́слити ми полéзная всегдá настáви мя.

Слава: Устáви сéрдце моé от настоя́щаго мятéжа, и бдéти укрепи́ мя во благи́х, храни́телю мой, и настáви мя чу́дно к тишинé живóтней.

И ныне: Слóво Бóжие в Тя всели́ся, Богоро́дице, и человéком Тя показá небéсную лéствицу; Тобóю бо к нам Вы́шний сошéл есть.

Кондак, глас 4-й

Яви́ся мне милосéрд, святы́й Ангеле Госпóдень, храни́телю мой, и не отлучáйся от менé сквéрнаго, но просвети́ мя свéтом неприкосновéнным и сотвори́ мя достóйна Цáрствия Небéснаго.

Икос

Уничижéнную ду́шу мою́ мнóгими соблáзны, ты, святы́й предстáтелю, неизречéнныя слáвы небéсный сподóби, и певéц с ли́ки безплóтных сил Бóжиих, поми́луй мя и сохрани́, и пóмыслы дóбрыми ду́шу мою́ просвети́, да твоéю слáвою, Ангеле мой, обогащуся, и низложи́ зломы́слящия мне враги́, и сотвори́ мя достóйна Цáрствия Небéснаго.

Песнь 7

Ирмос: От Иудéи дошéдше óтроцы, в Вавило́не иногдá, вéрою Тро́ическою плáмень пéщный попрáша, пою́ще: отцéв Бóже, благословéн еси́.

Святы́й Ангеле Бóжий, храни́телю мой, моли́ Бóга о мне.

Ми́лостив бу́ди ми и умоли́ Бóга, Госпóдень Ангеле, имéю бо тя засту́пника во всем животé моéм, настáвника же и храни́теля, от Бóга даровáннаго ми во вéки.

Святы́й Ангеле Бóжий, храни́телю мой, моли́ Бóга о мне.

Не остáви в путь шéствующия души́ моея́ окая́нныя уби́ти разбóйником, святы́й Ангеле, я́же ти от Бóга преданá бысть непорóчне; но настáви ю́ на путь покая́ния.

Слава: Всю посрáмлену ду́шу мою́ привожду́ от лукáвых ми пóмысл и дел: но предвари́, настáвниче мой, и исцелéние ми подáждь благи́ми по́мыслы, уклоня́ти ми ся всегдá на прáвыя стези́.

И ныне: Прему́дрости испóлни всех и крéпости Божéственный, Ипостáсная Прему́дросте Вы́шняго, Богорóдицы рáди, вéрою вопию́щих: отéц нáших Бóже, благословéн еси́.

Песнь 8

Ирмос: Царя́ Небéснаго, Егóже пою́т во́и áнгельстии, хвали́те и превозноси́те во вся вéки.

Святы́й Ангеле Бóжий, храни́телю мой, моли́ Бóга о мне.

От Бóга пóсланный, утверди́ живóт мой, рабá твоегó, преблаги́й Ангеле, и не остáви менé во вéки.

Святы́й Ангеле Бóжий, храни́телю мой, моли́ Бóга о мне.

Ангела тя су́ща блáга, души́ моея́ настáвника и храни́теля, преблáженне, воспевáю во вéки.

Слава: Бу́ди ми покрóв и забрáло в день испытáния всех человéк, вóньже огнéм искушáются делá благáя же и злáя.

И ныне: Бу́ди ми Помóщница и тишинá, Богоро́дице Приснодéво, рабу́ Твоему́, и не остáви менé лишéна бы́ти Твоегó влады́чества.

Песнь 9

Ирмос: Вои́стинну Богорóдицу Тя исповéдуем, спасéннии Тобóю, Дéво Чи́стая, с безплóтными ли́ки Тя величáюще.

Иису́су: Гóсподи Иису́се Христé Бóже мой, поми́луй мя.

Поми́луй мя, еди́не Спáсе мой, я́ко Ми́лостив еси́ и Милосéрд, и прáведных ликóв сотвори́ мя причáстника.

Святы́й Ангеле Бóжий, храни́телю мой, моли́ Бóга о мне.

Мы́слити ми при́сно и твори́ти, Госпóдень Ангеле, благáя и полéзная дáруй, я́ко си́льна яви́ в нéмощи и непорóчна.

Слава: Яко имéя дерзновéние к Царю́ Небéсному, Тогó моли́, с прóчими безплóтными, поми́ловати мя окая́ннаго.

И ныне: Мнóго дерзновéние иму́щи, Дéво, к Воплóщшемуся из Тебé, преложи́ мя от уз и разрешéние ми подáждь и спасéние, моли́твами Твои́ми.

Молитва Ангелу хранителю

Ангеле Христóв святы́й, к тебé припáдая молю́ся, храни́телю мой святы́й, придáнный мне на соблюдéние души́ и тéлу моему́ грéшному от Святáго Крещéния, аз же своéю лéностию и свои́м злым обы́чаем прогнéвах твою́ пречи́стую свéтлость и отгнáх тя от себé всéми сту́дными дéлы: лжáми, клеветáми, зáвистию, осуждéнием, презóрством, непокóрством, братоненавидéнием, и злопомнéнием, сребролю́бием, прелюбодея́нием, я́ростию, ску́постию, объядéнием без сы́тости и опи́вством, многоглагóланием, злы́ми пóмыслы и лукáвыми, гóрдым обы́чаем и блу́дным возбешéнием, имы́й самохотéние на вся́кое плотскóе вожделéние. О, злóе моé произволéние, егóже и скóти безсловéснии не творя́т! Да кáко возмóжеши воззрéти на мя, или́ приступи́ти ко мне, áки псу смердя́щему? Котóрыма очи́ма, Ангеле Христóв, воззри́ши на мя, оплéтшася зле во гну́сных дéлех? Да кáко ужé возмогу́ отпущéния проси́ти гóрьким и злым мои́м и лукáвым дея́нием, в ня́же впадáю по вся дни и нóщи и на всяк час? Но молю́ся ти припáдая, храни́телю мой святы́й, умилосéрдися на мя грéшнаго и недостóйнаго рабá твоегó (имя), бу́ди ми помóщник и засту́пник на злáго моегó сопроти́вника, святы́ми твои́ми моли́твами, и Цáрствия Бóжия причáстника мя сотвори́ со всéми святы́ми, всегдá, и ны́не и при́сно и во вéки векóв. Ами́нь.

Особо усердные христиане могут дополнительно читать акафисты Господу Иисусу Христу и Божьей Матери.

Акафист Сладчайшему Господу нашему Иисусу Христу

Кондак 1

Возбрáнный Воевóдо и Гóсподи, áда победи́телю, я́ко избáвлься от вéчныя смéрти, похвáльная воспису́ю Ти, создáние и раб Твой; но я́ко имéяй милосéрдие неизречéнное, от вся́ких мя бед свободи́, зову́ща: Иису́се, Сы́не Бóжий, поми́луй мя.

Икос 1

Ангелов Твóрче и Гóсподи сил, отвéрзи ми недоумéнный ум и язы́к на похвалу́ пречи́стаго Твоегó и́мене, я́коже глухóму и гугни́вому дрéвле слух и язы́к отвéрзл еси́, и глагóлаше зовы́й таковáя: Иису́се пречу́дный, Ангелов удивлéние; Иису́се преси́льный, прароди́телей избавлéние. Иису́се преслáдкий, патриáрхов величáние; Иису́се преслáвный, вéрных укреплéние. Иису́се прелюби́мый, прорóков исполнéние; Иису́се преди́вный, му́чеников крéпосте. Иису́се прети́хий, монáхов рáдосте; Иису́се преми́лостивый, пресви́теров слáдосте. Иису́се премилосéрдый, пóстников воздержáние; Иису́се преслáдостный, преподóбных рáдование. Иису́се пречестны́й, дéвственных целому́дрие; Иису́се предвéчный, грéшников спасéние. Иису́се, Сы́не Бóжий, поми́луй мя.

Кондак 2

Ви́дя вдови́цу зéльне плáчущую, Гóсподи, я́коже тогдá умилосéрдився, сы́на ея́ на погребéние несóма воскреси́л еси́: си́це и о мне умилосéрдися, Человеколю́бче, и грехáми умерщвлéнную мою́ ду́шу воскреси́, зову́щую: Аллилу́иа.

Икос 2

Рáзум неуразумéнный разумéти Фили́пп ищá, Гóсподи, покажи́ нам Отцá, глагóлаше; Ты же к нему́: толи́кое врéмя сый со Мнóю, не познáл ли еси́, я́ко Отéц во Мне, и Аз во Отцé есмь? Тéмже, Неизслéдованне, со стрáхом зову́ Ти: Иису́се, Бóже предвéчныи́; Иису́се, Царю́ преси́льный. Иису́се, Влады́ко долготерпели́выи́; Иису́се, Спáсе преми́лостивый. Иису́се, храни́телю мой преблаги́й; Иису́се, очи́сти грехи́ моя́. Иису́се, отыми́ беззакóния моя́; Иису́се, отпусти́ непрáвды моя́. Иису́се, надéждо моя́, не остáви менé; Иису́се, помóщниче мой, не отри́ни менé. Иису́се, Создáтелю мой, не забу́ди менé; Иису́се, Пáстырю мой, не погуби́ менé. Иису́се, Сы́не Бóжий, поми́луй мя.

Кондак 3

Си́лою свы́ше апóстолы облеки́й, Иису́се, во Иерусали́ме седя́щия, облецы́ и менé, обнажéннаго от вся́каго благотворéния, теплотóю Ду́ха Святáго Твоегó, и даждь ми с любóвию пéти Тебé: Аллилу́иа.

Икос 3

Имéяй богáтство милосéрдия, мытари́ и грéшники, и невéрныя призвáл еси́, Иису́се; не прéзри и менé ны́не, подóбнаго им, но я́ко многоцéнное ми́ро, приими́ песнь сию: Иису́се, си́ло непобеди́мая; Иису́се, ми́лосте безконéчная. Иису́се, красотó пресвéтлая; Иису́се, любы́ неизречéнная. Иису́се, Сы́не Бóга живáго; Иису́се, поми́луй мя грéшнаго. Иису́се, услы́ши мя, в беззакóниих зачáтаго; Иису́се, очи́сти мя, во гресéх рождéннаго. Иису́се, научи́ мя непотрéбнаго; Иису́се, освети́ мя тéмнаго. Иису́се, очи́сти мя сквéрнаго; Иису́се, возведи́ мя блу́днаго. Иису́се, Сы́не Бóжий, поми́луй мя.

Кондак 4

Бу́рю внутрь имéяй помышлéний сумни́тельных, Петр утопáше; узрéв же во плóти Тя су́ща, Иису́се, и по водáм ходя́ща, познá Тя Бо́га и́стиннаго, и ру́ку спасéния получи́в, речé: Аллилу́иа.

Икос 4

Слы́ша слепы́й мимоходя́ща Тя, Гóсподи, путéм, вопия́ше: Иису́се, Сы́не Дави́дов, поми́луй мя! И, призвáв, отвéрзл еси́ óчи его. Просвети́ у́бо ми́лостию Твоéю óчи мы́сленныя сéрдца и менé, вопию́ща Ти и глагóлюща: Иису́се, вы́шних Создáтелю; Иису́се, ни́жних Искупи́телю. Иису́се, преиспóдних потреби́телю; Иису́се, всея́ твáри украси́телю. Иису́се, души́ моея́ утéшителю; Иису́се, умá моегó просвети́телю. Иису́се, сéрдца моегó весéлие; Иису́се, тéла моегó здрáвие. Иису́се, Спáсе мой, спаси́ мя; Иису́се, свéте мой, просвети́ мя. Иису́се, му́ки вся́кия избáви мя; Иису́се, спаси́ мя недостóйнаго. Иису́се, Сы́не Бóжий, поми́луй мя.

Кондак 5

Боготóчною Крóвию я́коже искупи́л еси́ нас дрéвле от закóнныя кля́твы, Иису́се, си́це изми́ нас от сéти, éюже змий запя́т ны страстьми́ плотски́ми, и блу́дным наваждéнием, и злым уны́нием, вопию́щия Ти: Аллилу́иа.

Икос 5

Ви́девше óтроцы еврéйстии во óбразе человéчестем Создáвшаго рукóю человéка, и Влады́ку разумéвше Его, потщáшася вéтвьми угоди́ти Ему́, осáнна вопию́ще. Мы же песнь принóсим Ти, глагóлюще: Иису́се, Бóже и́стинныи́; Иису́се, Сы́не Дави́дов. Иису́се, Царю́ преслáвный; Иису́се, Агнче непорóчный. Иису́се, Пáстырю преди́вный; Иису́се, храни́телю во млáдости моéй. Иису́се, корми́телю во ю́ности моéй; Иису́се, похвалó в стáрости моéй. Иису́се, надéждо в смéрти моéй; Иису́се, животé по смéрти моéй. Иису́се, утешéние моé на судé Твоéм; Иису́се, желáние моé, не посрами́ менé тогдá. Иису́се, Сы́не Бóжий, поми́луй мя.

Кондак 6

Проповéдник богонóсных вещáние и глагóлы исполня́я, Иису́се, на земли́ я́влься и с человéки Невмести́мый пожи́л еси́, и болéзни нáша подъя́л еси́, отоню́дуже ранами Твои́ми мы исцелéвше, пéти навыкóхом: Аллилу́иа.

Икос 6

Возсия́ вселéнней просвещéние и́стины Твоея́, и отгнáся лесть бесóвская: и́доли бо, Спáсе наш, не терпя́ще Твоея́ крéпости, падóша. Мы же, спасéние получи́вше, вопиéм Ти: Иису́се, и́стино, лесть отгоня́щая; Иису́се, свéте, превы́шший всех свéтлостей. Иису́се, Царю́, премогáяй всех крéпости; Иису́се, Бо́же, пребывáяй в ми́лости. Иису́се, Хлéбе живóтный, насы́ти мя áлчущаго; Иису́се, истóчниче рáзума, напои́ мя жáждущаго. Иису́се, одéждо весéлия, одéй мя тлéннаго; Иису́се, покрóве рáдости, покры́й мя недостóйнаго. Иису́се, подáтелю прося́щим, даждь ми плач за грехи́ моя́; Иису́се, обрéтение и́щущим, обря́щи ду́шу мою́. Иису́се, отвéрзителю толку́щим, отвéрзи сéрдце моé окая́нное; Иису́се, Искупи́телю грéшных, очи́сти беззакóния моя́. Иису́се, Сы́не Бóжий, поми́луй мя.

Кондак 7

Хотя́ сокровéнную тáйну от вéка откры́ти, я́ко овчá на заколéние ведéн был еси́, Иису́се, и я́ко áгнец пря́мо стригу́щаго его безглáсен, и я́ко Бог из мéртвых воскрéсл еси́, и со слáвою на небесá вознéслся еси́, и нас совоздви́гл еси́, зову́щих: Аллилу́иа.

Икос 7

Ди́вную показá тварь, явлéйся Творéц нам: без сéмене от Дéвы воплоти́ся, из грóба, печáти не руши́в, воскрéсе, и ко апóстолом, двéрем затворéнным, с плóтию вни́де. Тéмже чудя́щеся, воспои́м: Иису́се, Слóве необымéнный; Иису́се, Слóве несоглядáемый. Иису́се, си́ло непостижи́мая; Иису́се, му́дросте недомы́слимая. Иису́се, Божествó неопи́санное; Иису́се, госпóдство неисчéтное. Иису́се, цáрство непобеди́мое; Иису́се, влады́чество безконéчное. Иису́се, крéпосте высочáйшая; Иису́се, влáсте вéчная. Иису́се, Твóрче мой, ущéдри мя; Иису́се, Спáсе мой, спаси́ мя. Иису́се, Сы́не Бóжий, поми́луй мя.

Кондак 8

Стрáнно Бóга вочеловéчшася ви́дяще, устрани́мся су́етнаго ми́ра и ум на Божéственная возлóжим. Сегó бо рáди Бог на зéмлю сни́де, да нас на небесá возведéт, вопию́щих Ему: Аллилу́иа.

Икос 8

Весь бе в ни́жних, и вы́шних никáкоже отступи́ Неисчéтный, егдá вóлею нас рáди пострадá, и смéртию Своéю нáшу смерть умертви́, и воскресéнием живóт даровá пою́щим: Иису́се, слáдосте сердéчная; Иису́се, крéпосте телéсная. Иису́се, свéтлосте душéвная; Иису́се, быстротó у́мная. Иису́се, рáдосте сóвестная; Иису́се, надéждо извéстная. Иису́се, пáмяте предвéчная; Иису́се, похвалó высóкая. Иису́се, слáво моя́ превознесéнная; Иису́се, желáние моé, не отри́ни менé. Иису́се, Пáстырю мой, взыщи́ менé; Иису́се, Спáсе мой, спаси́ менé. Иису́се, Сы́не Бóжий, поми́луй мя.

Кондак 9

Все естествó áнгельское безпрестáни слáвит пресвятóе и́мя Твоé, Иису́се, на небеси́, Свят, Свят, Свят вопию́ще; мы же грéшнии на земли́ брéнными устнáми вопиéм: Аллилу́иа.

Икос 9

Вети́я многовещáнныя я́коже ры́бы безглáснии ви́дим о Тебé, Иису́се, Спáсе наш: недоумéют бо глагóлати, кáко Бог непрелóжный и человéк совершéнный пребывáеши? Мы же тáинству дивя́щеся, вопиéм вéрно: Иису́се, Бóже предвéчный; Иису́се, Царю́ цáрствующих. Иису́се, Влады́ко владéющих; Иису́се, Судиé живы́х и мéртвых. Иису́се, надéждо ненадéжных; Иису́се, утешéние плáчущих. Иису́се, слáво ни́щих; Иису́се, не осуди́ мя по дело́м мои́м. Иису́се, очи́сти мя по ми́лости Твоéй; Иису́се, отжени́ от менé уны́ние. Иису́се, просвети́ моя́ мы́сли сердéчныя; Иису́се, даждь ми пáмять смéртную. Иису́се, Сы́не Бóжий, поми́луй мя.

Кондак 10

Спасти́ хотя́ мир, Востóче востóком, к тéмному зáпаду — естеству́ нáшему пришéд, смири́лся еси́ до смéрти; тéмже превознесéся и́мя Твоé пáче вся́каго и́мене, и от всех колéн небéсных и земны́х слы́шиши: Аллилу́иа.

Икос 10

Царю́ Превéчный, Утéшителю, Христé и́стинный, очи́сти ны от вся́кия сквéрны, я́коже очи́стил еси́ дéсять прокажéнных, и исцели́ ны, я́коже исцели́л еси́ сребролюби́вую ду́шу Закхéа мытаря́, да вопиéм Ти, во умилéнии зову́ще: Иису́се, сокрóвище нетлéнное; Иису́се, богáтство неистощи́мое. Иису́се, пи́ще крéпкая; Иису́се, питиé неисчерпáемое. Иису́се, ни́щих одея́ние; Иису́се, вдов заступлéние. Иису́се, си́рых защи́тниче; Иису́се, труждáющихся пóмоще. Иису́се, стрáнных настáвниче; Иису́се, плáвающих кóрмчий. Иису́се, бу́рных оти́шие; Иису́се Бóже, воздви́гни мя пáдшаго. Иису́се, Сы́не Бóжий, поми́луй мя.

Кондак 11

Пéние всеумилéнное приношу́ Ти недостóйный, вопию́ Ти я́ко хананéа: Иису́се, поми́луй мя; не дщерь бо, но плоть и́мам, страстьми́ лю́те беся́щуюся и я́ростию пали́мую, и исцелéние даждь вопию́щу Ти: Аллилу́иа.

Икос 11

Светоподáтельна свети́льника су́щим во тьме неразу́мия, прéжде гоня́й Тя Пáвел, богоразу́мнаго глáса си́лу внуши́ и душéвную быстроту́ уясни́; си́це и менé тéмныя зени́цы душéвныя просвети́, зову́ща: Иису́се, Царю́ мой прекрéпкий; Иису́се, Бóже мой преси́льный. Иису́се, Гóсподи мой пребезсмéртный; Иису́се, Создáтелю мой преслáвный. Иису́се, Настáвниче мой предóбрый; Иису́се, Пáстырю мой прещéдрый. Иису́се, Влады́ко мой преми́лостивыи́; Иису́се, Спáсе мой премилосéрдый. Иису́се, просвети́ моя́ чу́вствия, потемнéнная страстьми́; Иису́се, исцели́ моé тело, оструплéнное грехми́. Иису́се, очи́сти мой ум от пóмыслов су́етных; Иису́се, сохрани́ сéрдце моé от пóхотей лукáвых. Иису́се, Сы́не Бóжий, поми́луй мя.

Кондак 12

Благодáть подáждь ми, всех долгóв реши́телю, Иису́се, и приими́ мя кáющася, я́коже прия́л еси́ Петрá, отвéргшагося Тебé, и призови́ мя унывáющаго, я́коже дрéвле Пáвла, гоня́ща Тя, и услы́ши мя, вопию́ща Ти: Аллилу́иа.

Икос 12

Пою́ще Твоé вочеловéчение, восхваля́ем Тя вси, и вéруем со Фомóю, я́ко Госпóдь и Бог еси́, седя́й со Отцéм и хотя́й суди́ти живы́м и мéртвым. Тогдá у́бо сподóби мя деснáго стоя́ния, вопию́щаго: Иису́се, Царю́ предвéчный, поми́луй мя; Иису́се, цвéте благовóнный, облагоухáй мя. Иису́се, теплотó люби́мая, огрéй мя; Иису́се, хрáме предвéчный, покры́й мя. Иису́се, одéждо свéтлая, украси́ мя; Иису́се, би́сере честны́й, осия́й мя. Иису́се, кáменю драги́й, просвети́ мя; Иису́се, Сóлнце прáвды, освети́ мя. Иису́се, свéте святы́й, облистáй мя; Иису́се, болéзни душéвныя и телéсныя избáви мя. Иису́се, из руки́ сопроти́вныя изми́ мя; Иису́се, огня́ негаси́маго и прóчих вéчных мук свободи́ мя. Иису́се, Сы́не Бóжий, поми́луй мя.

Кондак 13

О, преслáдкий и всещéдрый Иису́се! Приими́ ны́не мáлое молéние сиé нáше, я́коже прия́л еси́ вдови́цы две лéпте, и сохрани́ достоя́ние Твоé от враг ви́димых и неви́димых, от нашéствия иноплемéнник, от неду́га и глáда, от вся́кия скóрби и смертонóсныя рáны, и гряду́щия изми́ му́ки всех, вопию́щих Ти: Аллилу́иа.

Этот кондак читается трижды, затем 1-й икос: Ангелов Твóрче… и 1-й кондак: Возбрáнный Воевóдо…

Икос 1

Ангелов Твóрче и Гóсподи сил, отвéрзи ми недоумéнный ум и язы́к на похвалу́ пречи́стаго Твоегó и́мене, я́коже глухóму и гугни́вому дрéвле слух и язы́к отвéрзл еси́, и глагóлаше зовы́й таковáя: Иису́се пречу́дный, Ангелов удивлéние; Иису́се преси́льный, прароди́телей избавлéние. Иису́се преслáдкий, патриáрхов величáние; Иису́се преслáвный, вéрных укреплéние. Иису́се прелюби́мый, прорóков исполнéние; Иису́се преди́вный, му́чеников крéпосте. Иису́се прети́хий, монáхов рáдосте; Иису́се преми́лостивый, пресви́теров слáдосте. Иису́се премилосéрдый, пóстников воздержáние; Иису́се преслáдостный, преподóбных рáдование. Иису́се пречестны́й, дéвственных целому́дрие; Иису́се предвéчный, грéшников спасéние. Иису́се, Сы́не Бóжий, поми́луй мя.

Кондак 1

Возбрáнный Воевóдо и Гóсподи, áда победи́телю, я́ко избáвлься от вéчныя смéрти, похвáльная воспису́ю Ти, создáние и раб Твой; но я́ко имéяй милосéрдие неизречéнное, от вся́ких мя бед свободи́, зову́ща: Иису́се, Сы́не Бóжий, поми́луй мя.

Молитва

Влады́ко Гóсподи Иису́се Христé Бóже мой, Иже неизречéннаго рáди Твоегó человеколю́бия на конéц векóв во плоть оболки́йся от Приснодéвы Мари́и, слáвлю о мне Твоé спаси́тельное промышлéние, раб Твой, Влады́ко; песнослóвлю Тя, я́ко Тебé рáди Отцá познáх; благословлю́ Тя, Его́же рáди и Дух Святы́й в мир прии́де; покланя́юся Твоéй по плóти Пречи́стей Мáтери, таковéй стрáшней тáйне послужи́вшей; восхваля́ю Твоя́ áнгельская ликостоя́ния, я́ко воспевáтели и служи́тели Твоегó вели́чествия; ублажáю Предтéчу Иоáнна, Тебé крести́вшаго, Гóсподи; почитáю и провозвести́вшия Тя прорóки, прославля́ю апóстолы Твоя́ святы́я; торжеству́ю же и му́ченики, свящéнники же Твоя́ слáвлю; покланя́юся преподóбным Твои́м, и вся Твоя́ прáведники пéстунствую. Таковáго и толи́каго мнóгаго и неизречéннаго ли́ка Божéственнаго в моли́тву привожду́ Тебé, всещéдрому Бóгу, раб Твой, и сегó рáди прошу́ мои́м согрешéнием прощéния, éже дáруй ми всех Твои́х рáди святы́х, изря́днее же святы́х Твои́х щедрóт, я́ко Благословéн еси́ во вéки, ами́нь.

Акафист Пресвятой Богородице

Кондак 1

Взбрáнной Воевóде победи́тельная, я́ко избáвльшеся от злых, благодáрственная воспису́ем Ти раби́ Твои́, Богорóдице; но я́ко иму́щая держáву непобеди́мую, от вся́ких нас бед свободи́, да зовéм Ти: рáдуйся, Невéсто Неневéстная.

Икос 1

Ангел предстáтель с небесé пóслан бысть рещи́ Богорóдице: рáдуйся, и со безплóтным глáсом воплощáема Тя зря, Гóсподи, ужасáшеся и стоя́ше, зовы́й к Ней таковáя: Рáдуйся, Еюже рáдость возсия́ет; рáдуйся, Еюже кля́тва исчéзнет. Рáдуйся, падшаго Адама воззвание; рáдуйся, слез Евиных избавлéние. Рáдуйся, высотó неудобовосходи́мая человéческими пóмыслы; рáдуйся, глубинó неудобозри́мая и áнгельскима очи́ма. Рáдуйся, я́ко еси́ Царéво седáлище; рáдуйся, я́ко нóсиши Нося́щаго вся. Рáдуйся, Звездó, явля́ющая; рáдуйся, утрóбо Божéственнаго воплощéния. Рáдуйся, Еюже обновля́ется тварь; рáдуйся, Еюже покланя́емся Творцу́. Рáдуйся, Невéсто Неневéстная.

Кондак 2

Ви́дящи Святáя Себé в чистотé, глагóлет Гаврии́лу дéрзостно: преслáвное твоегó глáса неудобоприя́тельно души́ Моéй явля́ется: безсéменнаго бо зачáтия рождествó кáко глагóлеши, зовы́й: Аллилу́иа.

Икос 2

Рáзум недоразумевáемый разумéти Дéва и́щущи, возопи́ к служáщему: из боку́ чи́сту, Сы́ну кáко есть роди́тися мóщно, рцы Ми? К Нéйже он речé со стрáхом, обáче зовый сице: Рáдуйся, совéта неизречéннаго Таи́ннице; рáдуйся, молчáния прося́щих вéро. Рáдуйся, чудéс Христóвых начáло; рáдуйся, велéний Егó глави́зно. Рáдуйся, лéствице небéсная, Еюже сни́де Бог; рáдуйся, мóсте, преводя́й су́щих от земли́ на нéбо. Рáдуйся, Ангелов многослову́щее чу́до; рáдуйся, бесóв многоплачéвное поражéние. Рáдуйся, Свет неизречéнно роди́вшая; рáдуйся, éже кáко, ни еди́наго же научи́вшая. Рáдуйся, прему́дрых превосходя́щая рáзум; рáдуйся, вéрных озаря́ющая смы́слы. Рáдуйся, Невéсто Неневéстная.

Кондак 3

Си́ла Вы́шняго осени́ тогдá к зачáтию Браконеиску́сную, и благоплóдная Тоя́ ложеснá, я́ко селó показá слáдкое, всем хотя́щим жáти спасéние, внегдá пéти си́це: Аллилу́иа.

Икос 3

Иму́щи Богоприя́тную Дéва утрóбу, востечé ко Елисавéти: младéнец же óноя áбие познáв Сея́ целовáние, рáдовашеся, и игрáньми я́ко пéсньми вопия́ше к Богорóдице: Рáдуйся, óтрасли неувядáемыя рóзго; рáдуйся, Плодá безсмéртнаго стяжáние. Рáдуйся, Дéлателя дéлающая Человеколю́бца; рáдуйся, Сади́теля жи́зни нáшея рóждшая. Рáдуйся, ни́во, растя́щая гобзовáние щедрóт; рáдуйся, трапéзо, нося́щая оби́лие очищéния.

Рáдуйся, я́ко рай пи́щный процветáеши; рáдуйся, я́ко пристáнище душáм готóвиши. Рáдуйся, прия́тное моли́твы кади́ло; рáдуйся, всегó ми́ра очищéние. Рáдуйся, Бóжие к смéртным благоволéние; рáдуйся, смéртных к Бóгу дерзновéние. Рáдуйся, Невéсто Неневéстная.

Кондак 4

Бу́рю внутрь имéя помышлéний сумни́тельных, целому́дренный Иóсиф смятéся, к Тебé зря небрáчней, и бракоокрáдованную помышля́я, Непорóчная; увéдев же Твоé зачáтие от Ду́ха Свя́та, речé: Аллилу́иа.

Икос 4

Слы́шаша пáстырие Ангелов пою́щих плотскóе Христóво пришéствие, и тéкше я́ко к Пáстырю ви́дят Сегó я́ко áгнца непорóчна, во чрéве Мари́ине упáсшася, Юже пою́ще рéша: Рáдуйся, Агнца и Пáстыря Мáти; рáдуйся, двóре словéсных овéц. Рáдуйся, неви́димых врагóв мучéние; рáдуйся, рáйских дверéй отверзéние. Рáдуйся, я́ко небéсная срáдуются земны́м; рáдуйся, Яко земнáя сликóвствуют небéсным. Рáдуйся, апóстолов немóлчная устá; рáдуйся, страстотéрпцев непобеди́мая дéрзосте. Рáдуйся, твéрдое вéры утверждéние; рáдуйся, свéтлое благодáти познáние. Рáдуйся, Еюже обнажи́ся ад; рáдуйся, Еюже облекóхомся слáвою. Рáдуйся, Невéсто Неневéстная.

Кондак 5

Боготéчную звезду́ узрéвше волсви́, тоя́ послéдоваша зари́, и я́ко свети́льник держáще ю́, тóю испытáху крéпкаго Царя́, и дости́гше Непостижи́маго, возрáдовашася, Ему́ вопию́ще: Аллилу́иа.

Икос 5

Ви́деша óтроцы халдéйстии на руку́ Деви́чу Создáвшаго рукáма человéки, и Влады́ку разумевáюще Егó, áще и рáбий прия́т зрак, потщáшася дарми́ послужи́ти Ему́, и возопи́ти Благословéнней: Рáдуйся, Звезды́ незаходи́мыя Мáти; рáдуйся, зарé тáинственнаго дне. Рáдуйся, прéлести пещь угаси́вшая; рáдуйся, Трóицы таи́нники просвещáющая. Рáдуйся, мучи́теля безчеловéчнаго изметáющая от начáльства; рáдуйся, Гóспода Человеколю́бца показáвшая Христá. Рáдуйся, вáрварскаго избавля́ющая служéния; рáдуйся, тимéния изымáющая дел. Рáдуйся, огня́ поклонéние угаси́вшая; рáдуйся, плáмене страстéй изменя́ющая. Рáдуйся, вéрных Настáвнице целому́дрия; рáдуйся, всех родóв весéлие. Рáдуйся, Невéсто Неневéстная.

Кондак 6

Проповéдницы богонóснии бы́вше волсви́, возврати́шася в Вавилóн, скончáвше Твоé прорóчество, и проповéдавше Тя Христá всем, остáвиша Ирода я́ко буеслóвна, не вéдуща пéти: Аллилу́иа.

Икос 6

Возсия́вый во Еги́пте просвещéние и́стины, отгнáл еси́ лжи тьму: и́доли бо егó, Спáсе, не терпя́ще Твоея́ крéпости, падóша, сих же избáвльшиися вопия́ху к Богорóдице: Рáдуйся, исправлéние человéков; рáдуйся, низпадéние бесóв. Рáдуйся, прéлести держáву попрáвшая; рáдуйся, и́дольскую лесть обличи́вшая. Рáдуйся, мóре, потопи́вшее фараóна мы́сленнаго; рáдуйся, кáменю, напои́вший жáждущия жи́зни. Рáдуйся, óгненный стóлпе, наставля́яй су́щия во тьме; рáдуйся, покрóве ми́ру, ши́рший óблака. Рáдуйся, пи́ще, мáнны приéмнице; рáдуйся, слáдости святы́я служи́тельнице. Рáдуйся, землé обетовáния; рáдуйся, из нея́же течéт мед и млéко. Рáдуйся, Невéсто Неневéстная.

Кондак 7

Хотя́щу Симеóну от ны́нешняго вéка престáвитися прелéстнаго, вдáлся еси́ я́ко младéнец тому́, но познáлся еси́ ему́ и Бог совершéнный. Тéмже удиви́ся Твоéй неизречéнней прему́дрости, зовы́й: Аллилу́иа.

Икос 7

Нóвую показá тварь, я́влься Зи́ждитель нам от Негó бы́вшим, из безсéменныя прозя́б утрóбы, и сохрани́в Ю, я́коже бе, нетлéнну, да чу́до ви́дяще, воспои́м Ю, вопию́ще: Рáдуйся, цвéте нетлéния; рáдуйся, вéнче воздержáния. Рáдуйся, воскресéния óбраз облистáющая; рáдуйся, áнгельское житиé явля́ющая. Рáдуйся, дрéво светлоплодови́тое, от негóже питáются вéрнии; рáдуйся, дрéво благосенноли́ственное, и́мже покрывáются мнóзи. Рáдуйся, во чрéве нося́щая Избáвителя пленéнным; рáдуйся, рóждшая Настáвника заблу́ждшим. Рáдуйся, Судии́ прáведнаго умолéние; рáдуйся, мнóгих согрешéний прощéние. Рáдуйся, одéждо наги́х дерзновéния; рáдуйся, любы́, вся́кое желáние побеждáющая. Рáдуйся, Невéсто Неневéстная.

Кондак 8

Стрáнное рождествó ви́девше, устрани́мся ми́ра, ум на небесá прелóжше: сегó бо рáди высóкий Бог на земли́ яви́ся смирéнный человéк, хотя́й привлещи́ к высотé Тому́ вопию́щия: Аллилу́иа.

Икос 8

Весь бе в ни́жних и вы́шних никáкоже отступи́ неопи́санное Слóво: снизхождéние бо Божéственное, не прехождéние же мéстное бысть, и рождествó от Дéвы Богоприя́тныя, слы́шащия сия́: Рáдуйся, Бóга невмести́маго вмести́лище; рáдуйся, честнáго тáинства двéри. Рáдуйся, невéрных сумни́тельное слы́шание; рáдуйся, вéрных извéстная похвалó. Рáдуйся, колесни́це пресвятáя Су́щаго на Херуви́мех; рáдуйся, селéние преслáвное Су́щаго на Серафи́мех. Рáдуйся, проти́вная в тóжде собрáвшая; рáдуйся, дéвство и рождествó сочетáвшая. Рáдуйся, Еюже разреши́ся преступлéние; рáдуйся, Еюже отвéрзеся рай. Рáдуйся, ключу́ Цáрствия Христóва; рáдуйся, надéждо благ вéчных. Рáдуйся, Невéсто Неневéстная.

Кондак 9

Вся́кое естествó áнгельское удиви́ся вели́кому Твоегó вочеловéчения дéлу: непристу́пнаго бо я́ко Бóга, зря́ше всем присту́пнаго Человéка, нам у́бо спребывáюща, слы́шаща же от всех: Аллилу́иа.

Икос 9

Вети́я многовещáнныя, я́ко ры́бы безглáснии ви́дим о Тебé, Богорóдице, недоумевáют бо глагóлати, éже кáко и Дéва пребывáеши, и роди́ти возмоглá еси́. Мы же, тáинству дивя́щеся, вéрно вопиéм: Рáдуйся, прему́дрости Бóжия прия́телище; рáдуйся, промышлéния Егó сокрóвище. Рáдуйся, любому́дрыя нему́дрыя явля́ющая; рáдуйся, хитрословéсныя безсловéсныя обличáющая. Рáдуйся, я́ко обуя́ша лю́тии взыскáтеле; рáдуйся, я́ко увядóша баснотвóрцы. Рáдуйся, афинéйская плетéния растерзáющая; рáдуйся, рыбáрския мрéжи исполня́ющая. Рáдуйся, из глубины́ невéдения извлачáющая; рáдуйся, мнóги в рáзуме просвещáющая. Рáдуйся, кораблю́ хотя́щих спасти́ся; рáдуйся, пристáнище житéйских плáваний. Рáдуйся, Невéсто Неневéстная.

Кондак 10

Спасти́ хотя́ мир, Иже всех Украси́тель, к сему́ самообетовáн прии́де, и Пáстырь сый, я́ко Бог, нас рáди яви́ся по нам Человéк: подóбным бо подóбное призвáв, я́ко Бог слы́шит: Аллилу́иа.

Икос 10

Стенá еси́ дéвам, Богорóдице Дéво, и всем к Тебé прибегáющим: и́бо небесé и земли́ Творéц устрóи Тя, Пречи́стая, всéлься во утрóбе Твоéй, и вся приглашáти Тебé научи́: Рáдуйся, стóлпе дéвства; рáдуйся, дверь спасéния. Рáдуйся, начáльнице мы́сленнаго наздáния; рáдуйся, подáтельнице Божéственныя блáгости. Рáдуйся, Ты бо обнови́ла еси́ зачáтыя сту́дно; рáдуйся, Ты бо наказáла еси́ окрáденныя умо́м. Рáдуйся, тли́теля смы́слов упраждня́ющая; рáдуйся, Сéятеля чистоты́ рóждшая. Рáдуйся, чертóже безсéменнаго уневéщения; рáдуйся, вéрных Гóсподеви сочетáвшая. Рáдуйся, дóбрая млáдопитательнице дéвам; рáдуйся, невестокраси́тельнице душ святы́х. Рáдуйся, Невéсто Неневéстная.

Кондак 11

Пéние вся́кое побеждáется, спрострéтися тщáщееся ко мнóжеству мнóгих щедрóт Твои́х: равночи́сленныя бо пескá пéсни áще принóсим Ти, Царю́ Святы́й, ничтóже совершáем достóйно, я́же дал еси́ нам, Тебé вопию́щим: Аллилу́иа.

Икос 11

Светоприéмную свещу́ су́щим во тьме я́вльшуюся, зрим Святу́ю Дéву, невещéственный бо вжигáющи огнь, наставля́ет к рáзуму Божéственному вся, зарéю ум просвещáющая, звáнием же почитáемая, си́ми: Рáдуйся, лучé у́мнаго Сóлнца; рáдуйся, свети́ло незаходи́маго Свéта. Рáдуйся, мо́лние, ду́ши просвещáющая; рáдуйся, я́ко гром враги́ устрашáющая. Рáдуйся, я́ко многосвéтлое возсиявáеши просвещéние; рáдуйся, я́ко многотеку́щую источáеши реку́. Рáдуйся, купéли живопису́ющая óбраз; рáдуйся, грехóвную отъéмлющая сквéрну. Рáдуйся, бáне, омывáющая сóвесть; рáдуйся, чáше, чéрплющая рáдость. Рáдуйся, обоня́ние Христóва благоухáния; рáдуйся, животé тáйнаго весéлия. Рáдуйся, Невéсто Неневéстная.

Кондак 12

Благодáть дáти восхотéв, долгóв дрéвних, всех долгóв Реши́тель человéком, прии́де Собóю ко отшéдшим Тогó благодáти, и раздрáв рукописáние, слы́шит от всех си́це: Аллилу́иа.

Икос 12

Пою́ще Твоé рождествó, хвáлим Тя вси, я́ко одушевлéнный храм, Богорóдице: во Твоéй бо всели́вся утрóбе содержáй вся рукóю Госпóдь, освяти́, прослáви и научи́ вопи́ти Тебé всех: Рáдуйся, селéние Бóга и Слóва; рáдуйся, Святáя Святы́х бóльшая. Рáдуйся, ковчéже, позлащéнный Ду́хом; рáдуйся, сокрóвище животá неистощи́мое. Рáдуйся, честны́й вéнче царéй благочести́вых; рáдуйся, честнáя похвалó иерéев благоговéйных. Рáдуйся, Цéркве непоколеби́мый стóлпе; рáдуйся, цáрствия неруши́мая стенó. Рáдуйся, Еюже воздви́жутся побéды; рáдуйся, Еюже низпадáют врáзи. Рáдуйся, тéла моегó врачевáние; рáдуйся, души́ моея́ спасéние. Рáдуйся, Невéсто Неневéстная.

Кондак 13

О, Всепéтая Мáти, рóждшая всех святы́х Святéйшее Слóво! Ны́нешнее приéмши приношéние, от вся́кия избáви напáсти всех, и бу́дущия изми́ му́ки, о Тебé вопию́щих: Аллилу́иа.

Этот кондак читается трижды, затем 1-й икос: Ангел предстáтель… и 1-й кондак: Взбрáнной Воевóде…

Икос 1

Ангел предстáтель с небесé пóслан бысть рещи́ Богорóдице: рáдуйся, и со безплóтным глáсом воплощáема Тя зря, Гóсподи, ужасáшеся и стоя́ше, зовы́й к Ней таковáя: Рáдуйся, Еюже рáдость возсия́ет; рáдуйся, Еюже кля́тва исчéзнет. Рáдуйся, падшаго Адама воззвание; рáдуйся, слез Евиных избавлéние. Рáдуйся, высотó неудобовосходи́мая человéческими пóмыслы; рáдуйся, глубинó неудобозри́мая и áнгельскима очи́ма. Рáдуйся, я́ко еси́ Царéво седáлище; рáдуйся, я́ко нóсиши Нося́щаго вся. Рáдуйся, Звездó, явля́ющая; рáдуйся, утрóбо Божéственнаго воплощéния. Рáдуйся, Еюже обновля́ется тварь; рáдуйся, Еюже покланя́емся Творцу́. Рáдуйся, Невéсто Неневéстная.

Кондак 1

Взбрáнной Воевóде победи́тельная, я́ко избáвльшеся от злых, благодáрственная воспису́ем Ти раби́ Твои́, Богорóдице; но я́ко иму́щая держáву непобеди́мую, от вся́ких нас бед свободи́, да зовéм Ти: рáдуйся, Невéсто Неневéстная.

Молитвы

О, Пресвятáя Госпожé Влады́чице Богорóдице, вы́шши еси́ всех Ангел и Архáнгел, и всея́ твáри честнéйши, Помóщнице еси́ оби́димых, ненадéющихся надéяние, убóгих Засту́пнице, печáльных утешéние, áлчущих Корми́тельнице, наги́х одея́ние, больны́х исцелéние, грéшных спасéние, христиáн всех поможéние и заступлéние. О, Всеми́лостивая Госпожé, Дéво Богорóдице Влады́чице, ми́лостию Твоéю спаси́ и поми́луй святéйшия патриáрхи правослáвныя, преосвящéнныя митрополи́ты, архиепи́скопы и епи́скопы и весь свящéннический и и́ноческий чин, и вся правослáвныя христиáны ри́зою Твоéю честно́ю защити́; и умоли́, Госпожé, из Тебé без сéмене воплоти́вшагося Христá Бóга нáшего, да препоя́шет нас си́лою Своéю свы́ше, на неви́димыя и ви́димыя враги́ нáша. О, Всеми́лостивая Госпожé Влады́чице Богорóдице! Воздви́гни нас из глубины́ грехóвныя и избáви нас от глáда, губи́тельства, от тру́са и потóпа, от огня́ и мечá, от нахождéния иноплемéнных и междоусóбныя брáни, и от напрáсныя смéрти, и от нападéния врáжия, и от тлетвóрных ветр, и от смертонóсные я́звы, и от вся́каго зла. Подáждь, Госпожé, мир и здрáвие рабóм Твои́м, всем правослáвным христиáном, просвети́ им ум, и óчи сердéчнии, éже ко спасéнию; и сподóби ны, грéшныя рабы́ Твоя́, Цáрствия Сы́на Твоегó, Христá Бóга нáшего; я́ко держáва Егó благословéна и препрослáвлена со Безначáльным Егó Отцéм и с Пресвяты́м и Благи́м, Животворя́щим Егó Ду́хом, ны́не и при́сно, и во вéки векóв. Ами́нь.

О, Пресвятáя Дéво Мáти Гóспода, Цари́це Небесé и земли́! Вонми́ многоболéзненному воздыхáнию душ нáших, при́зри с высоты́ святы́я Твоея́ на нас, с вéрою и любóвию покланя́ющихся пречи́стому óбразу Твоéму. Се бо грехми́ погружáемии и скорбьми обуревáемии, взирáя на Твой óбраз, я́ко живéй Ти су́щей с нáми, принóсим смирéнныя молéния нáша. Не и́мамы бо ни ины́я пóмощи, ни инáго предстáтельства, ни утешéния, тóкмо Тебé, о, Мáти всех скорбя́щих и обременéнных. Помози́ нам немощны́м, утоли́ скорбь нáшу, настáви на путь прáвый нас, заблуждáющих, уврачу́й и спаси́ безнадéжных, дáруй нам прóчее врéмя животá нáшего в ми́ре и тишинé проводи́ти подáждь христиáнскую кончи́ну, и на Стрáшнем Судé Сы́на Твоегó яви́ся нам милосéрдая Засту́пница, да всегдá поéм, величáем и слáвим Тя, я́ко благу́ю Засту́пницу рóда христиáнскаго, со всéми угоди́вшими Бóгу. Ами́нь.

Что можно почитать

Готовясь к исповеди и причастию в первый раз, невозможно осознать все грехи. Для этого нужно действие Божьей благодати, которая постепенно показывает человеку грязные уголки души. Сейчас большое количество людей, крещенных в детстве, но не живших по заповедям Господним, приходят в церковь по причине тяжелых скорбей.

Многие искренне считают, что жили достойно и особо не грешили. Таким людям полезно почитать:

• Евангелие;
• Новый Завет;
• закон Божий;
• жития угодников Божьих;
• святых отцов.

Эти труды помогут сопоставить свою жизнь с христианскими ценностями, возбудить совесть и увидеть дела, не соответствующие заповедям Господним. Готовиться к исповеди и причастию будет гораздо проще, если изучить православную веру, особенности духовной жизни.

Сейчас много религиозной литературы, и самостоятельно ориентироваться в ней сложно. Разумным решением будет обратиться за помощью к священнику, который подскажет тексты, учитывая уровень подготовленности.

Чаще всего при подготовке к исповеди духовники рекомендуют почитать небольшие издания:

• святителя Игнатия Брянчанинова «В помощь кающимся»;
• архимандрита Иоанна Крестьянкина «Опыт построения исповеди».

Как конкретно проходит подготовка к исповеди и причастию, что почитать перед этим, нужно узнавать в храме, куда планируется пойти.

Что нельзя делать перед таинством

Причастие — серьезное таинство, готовиться к нему нужно ответственно. Чтобы ощутить всю радость соединения с Господом, важно беречь душу от суетных дел и впечатлений. По возможности перед причастием лучше ограничить или исключить следующие действия:

• просмотр телевизора;
• пустое проведение времени в социальных сетях;
• не важные разговоры по телефону;
• посещение развлекательных мероприятий;
• интимную жизнь.

Перечисленные требования являются не обязательными, но желательными к выполнению.

Практические рекомендации и советы

Документ православной церкви «Об участии верных в Евхаристии» обозначает только общие положения, которых нужно придерживаться, чтобы достойно подготовиться.

Если человек впервые решает приступить к таинству, то лучше всего обратиться к священнику и выполнить все его рекомендации.

Взрослым людям, решившим исповедаться и причаститься, полезны будут следующие советы:

• изучить православную веру;
• познакомиться с правилами поведения в храме;
• просить у Господа прощения;
• качественно приготовиться к таинствам;
• после службы прочитать благодарственные молитвы;
• день причастия провести богоугодно.

Храм Божий — это святое место, приходить туда следует чистым, аккуратно и скромно одетым. Женщинам полагается длинная юбка или платье, покрытые плечи и голова. Мужчинам — брюки, рубашка. Спортивная, пляжная одежда не благословляется.

После 12 часов ночи перед причастием запрещено употреблять пищу, пить воду и курить. Мыться лучше до таинства. Перед исповедью особый пост не требуется, только тот, что благословлен священником перед причастием. Жизненно важные лекарства не считаются едой, их можно принимать. Утром умыться, почистить зубы, прочитать молитвы и идти на службу.